我……和我……=幸福

我好細膽，有人突然在我旁邊出現或講嘢，我就會嚇到大叫大跳，有時，我反應大到會嚇返人轉頭；但我又好大膽，我好鍾意玩刺激遊戲，好想玩笨豬跳和跳降傘。

我不喜歡成為焦點，出席親朋戚友聚會都扮隱形，最好唔好和我講嘢、唔好比旅行相我睇、唔好叫我玩BB抱BB逗BB……；但當我真正成為焦點時，我又會好勇，幼稚園自薦畢業禮獨誦表演、小學第一個衝上去搶咪唱K、中學周會致辭，結婚感謝媽媽整喊埋自己，全部成為我的回憶。

我有選擇困難症，今晚煮乜食乜、早餐買咩包、今天出唔出街、下午瞓唔瞓覺，我都要考慮一大輪，仲有可能搞到自己失眠；但我又可以好撇脫，大學揀咩科、搵工定辭職、告白分手結婚到搬屋，我都可以一剎那就決定。

我係好老婆，好想我老公幸福快樂；但我又好刁蠻，成日發脾氣成日蝦佢。

我鍾意自己咁立體，我覺得以上的都是優點，無錯，蝦佢都係優點，找到一個分享你喜怒哀樂的人就是一種幸福。