去年七月開始身體不適，錯過了很多特別日子的慶祝，不論是聖誕、新年或情人節都沒好好過，甚至連生日和結婚周年都沒紀念，訂了的餐廳改了又改，結果都是取消了在家休息。
本來排了公立，四個月有得見專科但內視鏡排到九月，要這半年日日吃不到睡不到好像太過了吧。一直覺得貴唔捨得睇私家，但終於忍唔住去找廿年前幫我照腸胃鏡的蕭醫生，照完有小事但沒大事，keep住覆診了兩個月，胃口終於正常，還舒緩了頭痛的老毛病，不用止痛藥當糖食，人變得生龍活虎，竟然還有力氣去了長洲和馬灣走一圈。
講十年都去不了的長洲，我竟然興致一來就找一個下午去了。吃了最好的印度菜，買了懷舊的巴黎撻和果占批，買了手信嬌姐大地魚粉；上了山頂道舊屋視察，以及必去我的Dream House朝聖。行程完美老公撞到舊學生舊同事去舊學校探人；只是允升隨心沒開無得食撞奶凍奶和糯米糍，以及太夜吃不到偉記魚蛋和通記腐皮卷。長洲變了很多，很多店很早就收了，租盤賣盤都比以前多，好想搬返入去，晚晚食完飯可以行西堤，星期六日又可以行山頂道和北眺亭。
去完長洲腳跛了但第二日入埋馬灣，吃最好吃的pizza但已經沒了鯷魚和海鮮口味，沒去舊居但去了以前探險的舊村。本來對舊村重建成不倫不類的景點不感興趣，但一場去到又想睇下變成點。以前探險的鬼屋已經油到五顏六色，曬蝦膏的痕跡都變成假魚假蟹假紅鶴的佈置，但行行下竟然見到一間刺繡小店，睇中一對耳環，唔捨得買但老公竟然話送比我。老闆很好心，本來要一對對買，但讓我拆散買鴛鴦一藍一綠的顏色，我就咁無啦啦多左份禮物，好開心。
最開心係我終於慶祝到生日了，老公生日我終於可以攪個小小的生日週，吃了幾頓特別飯：去了襟江飲茶，吃了老公想食好耐的金錢雞，我又食到好耐都無食既叉燒餐包，仲食到最愛的鴛鴦飯；食完中式食西式，又食我最喜歡的Shake Shack，最鍾意食剩雪糕或奶昔溝咖啡飲，再食個限定漢堡然後食埋炸蝦；食完西式食日式，一直覺得「千両」好貴，但以前食過佢D牛肉驚為天人，老公成日想再食佢又滑又香的牛肉。今次再食牛肉已經不如以往，但有新發現甜品超好食，老公叫了柚子酒配柚子雪糕，我就食最喜歡的Affogato。老公竟然唔識Affogato，第一次食嚇到佢話點解咁好食？！原來佢唔知我平時在Shake Shack就是在自製平民版Affogato，只是以為我在亂搞食物，哈哈！
.jpeg)
最後，好多謝蕭醫生，我真係好耐無過過正常的日子了，我終於可以想去邊就去邊啦！蕭醫生話仲有兩次覆診應該就完了，希望我一直健康下去啦！
