我是健康人

終於做完檢查了，竟然只有小事無大礙啊！

昨晚睡覺時我還在想，今天機會真的一半一半，由蕭醫生問診時的問題與反應，我都知道確實要做點心理準備，但……難道我是一個由頭到腳都經常嚴重唔舒服，但其實還算健康的人？

一做完檢查，腸胃都又在抽痛，好痛好痛，但我今次確定，它們只是在玩鬧，其實它們好健康的。

完成左兩個大檢查，下星期會做第三個，希望也能找到原因，只是小問題，可以解決它的！

放假日去喪吃

我因為對持續一個月的身體狀況太厭倦了，結果厭世了，無去睇醫生，唸住想先忘記一切，拖到真正覆診日再算，履行中學時已經奉行的「行樂須及春」的人生格言。

我想拋開惱人的擔心困擾，終於在星期三過了很充實的「老公放假天盡情享樂日」。一早去了壽司郎食「生三文魚腩三貫」，彌補上次做推廣時，我身體不適而錯過生三文魚腩的可恨；回程買了Chateraise的118元雪糕套餐，我從未試過一次過買十一款雪糕雪條，勁開心；晚飯就去了酒樓食魚。

事緣老公日前經過長沙灣翠湖，見到藍瓜子斑做優惠98元一條，就話不如去試下。雖然我對中式酒樓好有戒心，成日覺得會中伏：龍蝦有怪味、海蝦無蝦味、海鮮隨佢秤多少隨意、燒鵝只有肥膏無肉食、羊腩煲無羊羶甚至無肉味、金銀蛋菠菜硬到咬唔到……唔止一次滿心期望但失望離場，但我想食魚好耐了，就去試下條藍瓜子吧。

我不熟悉石斑魚，但有印象藍瓜子是好石斑？我本來以為能吃到肥美有膠質的魚肚，滑嘟嘟的魚鰭，但這條魚真的好鞋好韌，是我最害怕的咬唔爛的石斑類啊！今次真的中大伏，老公和隔離枱的姨姨都話條魚蒸得太老，但我覺得魚本身的油脂都不夠，一點魚油魚膏都沒有，好辛苦吃完條魚，結果我仲胃痛。最好吃是豉油撈飯。

另外叫了個孖寶套餐，海蝦拼黑椒燒鵝。廿年前在澳門食過好吃的黑椒燒鵝，今次這隻燒鵝皮脆有肉香，有淡淡黑椒味，但都是偏韌；整晚最好吃是海蝦，結實飽滿有蝦味，滿足了我好想吃蝦的願望。不過同樣都是老左少少，可能烚少一分鐘會更好。

食完餐飯胃痛，我和老公都覺得：酒樓係咪驚老人家怕d嘢唔熟，所有食物都煮熟d？樣樣都好似熟得滯咁？

雖然食物並不完美，但可以和老公難得撐枱腳，有傾有講有說有笑，不像平時你有你吃我有我玩電話，我已經覺得好幸福。結婚耐左，成日覺得變成室友。唔係唔愛唔係唔關心唔係唔快樂，但是有時係需要幸福感，去維繫細水長流的感情。

病得太耐的心境轉變

本來下星期三老公放假，係想趁仲有藥食身體還好時，去找間好吃的店大吃一頓，我滿腦都是：蝦蝦蝦。但是這一個月身體狀況異常，本來的放假天，就變成睇醫生日。

雖然我經常因身體不適取消約會，已經習慣晒所有身不由己。但難得老公放假又無得二人世界，確實超掃興。但奇怪狀態已持續太久，連成日逃避看醫生的我，都煩到想快點睇醫生解決左件事。

後生時，我是很積極看病的。那時的健康嚴重影響生活、工作和社交，我超積極看各科醫生，雖然看來看去都看不出一個所以來，但我並不害怕看醫生、做檢查和聽報告。那時總覺得能找到原因就可以藥到病除；當然，日後才知道有時病並沒有原因及對策，而學懂了改變心境與之共存。

人生都走了這麼久，看過了經歷過了，有病時開始不想知道不想理會，由它和我自由發展各自生存，要死就好好死，我唔想搞它了，反正發現它又不一定可以除掉，甚至可能更折磨。每想到這些，就更不想看病，直到病況影響我的情緒和生活，才緊張到心跳過百二的去看醫生，勇敢面對一次我的未來。

其實我並不害怕最差的到來，我知道什麼的日子都會過去的。只是我還是可以掌握一下：它什麼時候到來。起碼我的身體還是有自主權，要麼小事自己嚇自己，要麼就是痛苦並等待完結。

有點期待星期三的到來，究竟我會怎麼樣？是要做一個戰士，還是可以繼續當全職病人兼職婦人？

生日暨中秋蛋糕

今年生日無食生日蛋糕，中秋節買了兩件蛋糕補數，順便慶中秋。

兩款都是我喜歡的水果做的蛋糕：香蕉和哈蜜瓜。

首先是我以前吃過好喜歡，但後來消失了，近來又再推出的Italian Tomato的海鹽焦糖香蕉朱古力撻；另一個是蜜瓜及赤肉蜜瓜鐵觀音蛋糕。

海鹽焦糖香蕉朱古力撻是我好懷念的蛋糕，好像比以前更好吃了，中間的焦糖醬有點像樂家杏仁糖的拖肥，好香好甜好滑，香蕉也是滿滿的三大塊，餅底夠香脆，是難得比回憶更好的味道。

蛋糕碟用上前幾天在SHAKE SHACK套餐換購的陶瓷碟，有點美式的風味，放上兩件蛋糕後，突然有去了CHEESE FACTORY的感覺。

扶起我的BIGBANG

鍾意左BIGBANG咁耐，終於等到佢出新歌"BiiiG"，一聽好聽丫！睇埋個MV就覺得「好型呀！」先前DANCE PRACTICE版同演唱會Live版都上左YouTube，我都留返個紀念，這是我人生低潮中扶起我的BIGBANG呀！

睇完三條片，真係覺得BIGBANG實力仲好頂尖，佢唔係個d好耐無唱出返黎巡迴唱舊歌賺下錢的前輩歌手和組合團體。BIGBANG係認真的，真係認真做歌，認真表演，付出所有能量。BIGBANG真係好勵志，支持著很多在默默遊走的疲弱靈魂。

權志龍：「無論是上坡路還是下坡路，走著走著自然會有路。」

中秋節正日飯：糖心軒

近來好想食酒樓蒸魚，但一直都未有機會去。今天中秋節，約了媽去奧海城，本來想食大地烏冬；但我今天無胃口，唸住去BEF買法包回家各自吃就算，但突然想起附近的糖心軒，有平日最喜歡吃的斑頭腩啊，就一於夾啱兩點去吃個下午茶啦！

媽很開心，因為糖心軒比她平時吃的酒樓要好吃得多，而我又可以遷就大家的健康，點一些不油膩的菜式。每次去糖心軒，都是吃小菜比點心多，所以媽十分喜歡去糖心軒飲茶。

一來媽就問係咪可以食翅啊？我說可以呀，但貴個個係晚市才有半價，我們叫個鮑翅灌湯餃啦，湯好喝又有翅仔食。

跟住我又好想食蝦，但胃又不舒服，在蝦腸與蝦餃之中掙扎，最終揀左比較似少油的蝦餃，開心，平時都是吃菜苗餃多，很久沒吃蝦餃了。蝦餃一來到，媽就驚呼「咁大隻既？唔怪得貴咁多啦！」

最愛的陳皮蒸斑頭腩，好開心啊！

媽話我少食菜（其實我晚晚都食一大盒沙律菜），我就叫了豆豉炒芥蘭秋葵，秋葵對胃有益，我和媽都要多吃。

最後歎了幾杯壽眉，望住旁邊的人的鹹水角、芋角、煎蘿蔔糕、蝦多士、蛋散，全部都好想食但全部都唔食得，身體唔好就好多嘢都得個望字，但好處係可以慳返好多錢。我的欣慰是：我起碼仲有錢睇醫生丫！

中秋節快樂！

生日飯：殿大喜屋

去年生日去不到千海水產，今年生日改去殿大喜屋。雖然明知身體不好，吃不了很多。但是，一次過好像可以滿足好多願望，所以好開心好期待。

雖然今天胃有點不適，但要吃的都吃到了，開心是開心，但卻不是十分滿足，因為……

一去到，老公照例負責QR CODE點菜，我就出去巡視兼拿第一輪食物。我通常都是拿飲品，但見到我最愛的蝦，立刻無手都拿了幾隻，臨走眼尾看到旁邊有一盤東東，原來是三文魚籽啊，一大盤任拿啊！怎樣都要騰空隻手去舀了一羹，然後就滿滿足足的回座位，等待老公的讚賞。

當然回到又被老公唸我拿咁多隻蝦架？但我真係好想食蝦嘛……凍蝦結實好吃，三文魚籽都OK，但無飯送魚籽係鹹左D。

然後是很久沒見的鱆紅薄切，老公話是日最好吃就是這道菜。我飽到忘記是什麼味道了，是好吃的，彈牙爽口，老公說醬汁好吃，我也忘記乜味了。我反而喜歡希靈魚，無以前吃的咁酸，微酸不苦魚子爽脆，好吃。

跟住係是日既目標：龍蝦伊麵。雖然我已經有晒心理準備，一定無酒樓的澳洲龍蝦咁好味，但都係超級失望。龍蝦有點霉，食落有點鹼水味？每次吃到不好吃的龍蝦，我都覺得倒不如吃一斤白灼蝦好過。

是日次目標：羊鞍。都係好失望，雖然有點羶味，但似乎用了很重的中式醃料，有點像孜然粉之類。我喜歡孜然粉，但調味料搶晒羊的味道，我覺得意式香草都係最適合羊鞍。

至於蟶子就像避風塘系列咁，有粉絲及一大堆炸蒜，調味都好的，但蟶子有點過火，但我都滿意的了，因為太少機會食蟶子了。

是日大目標：鵝肝。鵝肝勁厚，表面煎得香脆，但不是入口即溶，是入口似膶那種。我覺得元氣的清酒鵝肝和壽司郎的焦糖鵝肝好食好多，哈哈。呢個係勝在夠厚啦，都過足口癮既。右後係老公想要的花膠，我唔鍾意花膠，覺得好難消化，食左兩啖，都算軟淋既，好過好多聲稱係花膠但食落係硬的「花膠」。

最後食到好飽，就走去玩果昔機。用我最愛的哈密瓜和香蕉打左一杯果昔，好玩又好飲既。但最好都係一塊塊哈密瓜咁食啦！

備註：燒菠蘿好酸。

今天要吃的都吃到了，開心是開心，但卻不是十分滿足，因為八百幾元，吃到很多種類，但吃的一般質素。調整下心態，雖然有更好吃的，但在近來的這個狀態下，做到要做的事情，多值得高興！

提早生日飯第三餐：Odelice之好食唔好食

我又去Odelice食大餐啦，但無去一排，餐牌又變左之餘，食物質素竟然差左好多……有可能以後都不會再去了。

疫情時，Odelice有好吃的蟹餅漢堡、橡果黑毛豬柳、班尼迪蛋布里歐修；疫情後，可以明白點解不再有蟹餅，但點解要追潮流將布里歐修換成牛角包？後來餐牌又改了，沒了很多有特色的東西，連Galette都只剩兩款。可能是成本關係吧，只要還是好吃的，我還是會去，但今次太失望了。

雖然如此但還是紀錄一下，我和Odelice可能的最後一聚。

一開始已經出事，以前的蘑菇湯好濃菇菇，現在忌廉奶味重，菇碎和菇味少了很多，似飲忌廉湯多過蘑菇湯。 

牛腹肉沒以前濃郁但都算keep到水準既，嫩嫩夠juicy，香草牛油汁酸酸的夠開胃；最好吃是炒薯粒，芝麻菜如果用黑醋不是灑普通芝士粉會好好多。

呢個紅酒汁牛面頰麵真係出晒事，麵條還有很多是黏在一起未煮熟。上菜時已經覺得唔妥，以前即使由紅酒牛頰肉寛條麵轉做紅酒牛頰肉蝴蝶粉時，個精萃都係個汁好夠味，今次汁唔夠之餘，仲只有蒜味沒有紅酒味，唯一可取是牛面頰兩大件，而且有膠質夠淋。但百幾元的意粉而麵條未熟實在不可接受！

之後係加錢的薄荷青瓜特飲，兩粒話梅我覺得係裝飾多過比味，一飲係有清爽青瓜味的，酸酸哋似係用檸檬汁加梳打水，薄荷都係裝飾作用大Ｄ，味道都OK既但唔算特別出色，要加十蚊黎講，倒不如飲可樂好了。

最後係當日VIP：Tiramisu Affogato。當初我純粹係見到Tiramisu就叫，都無留意佢係Affogato。所以一上就嚇親，咁靚既！雖然一直食都唔知上面一球的是什麼，像cake又像雪糕又像冰，下面的mascarpone可能因為淋左熱辣辣的espresso，勁軟身有點溶，裏面埋左一堆lotus餅乾碎。整體來說係好食，咖啡好苦，所有嘢撈埋一齊就好好食，不過係咪真係好食過傳統的Tiramisu？侍應一來一放低個杯就倒咖啡，其實我覺得應該比我自己倒。 Affogato倒咖啡唔應該係一個服務，而應該係一個體驗。

點樣可以唔甩頭髮加生髮？

唔知係咪近來身體唔好，定係我荷爾蒙波動？我狂甩頭髮呀！

我和洗頭水糾纏了幾個月，用了起碼五款聲稱防脫髮兼強健髮根的洗頭水、生物素洗頭水、藥效洗頭水，但無論邊款都講得好聽但實質無用，而且仲要愈甩愈多，有時用少少力一扯，頭髮就「卜」一聲甩出來，誇張至極。

直到前幾天照鏡時，頭頂一片反光，我深受打擊，立刻去剪左個人生以來最短的頭髮，好不好看已經不重要，我和髮型師講：「最緊要夠短。」

剪完頭髮，老公一見到我就大「嘩」一聲，平時感情毫無波瀾的他竟然咁大反應，嚇到我立刻問「我係咪好核突？」他當然好識做咁回答：「我從來未見過你咁短頭髮啫！唔核突呀。」

頭髮剪好了，我又重新研究洗頭水，才唸返起我幹麼要試新產品？用返以前剛食荷爾蒙藥脫髮時，用過比較好的洗頭水咪得囉！

努力回想下的記憶：Lush洗髮皂（最喜歡是情迷杜松果洗髮皂），Jason生物素洗髮水，YVES ROCHE豐盈洗髮露，Babyganics洗髮及沐浴露，Aveeno嬰兒天然燕麥沐浴洗髮露；加埋現在覺得幾OK既SUCCESS洗髮水，和之前用過但現在買不到的大島椿山茶花洗髮水。

但要用埋屋企D洗頭水先，雖然最甩頭髮的已經比我掉左，但我仲有三支不同的洗髮水有待用完，然後我就會回歸「舊洗頭水」懷抱，如果有用再寫文話比大家知^^。

又見蕭醫生之第一次真的緊張了

1.  今天覆診蕭醫生，第一次見他皺晒眉。上次他都是很輕鬆的告訴我胃只是輕微發炎，腸胃只是有點焦慮，好像一切都不用擔心。他輕輕鬆鬆的，我也會輕輕鬆鬆。

2.  今天告訴醫生我心臟持續亂跳，他一把脈就神色凝重，重複多次說我心跳真的很亂……立刻寫紙我去照心電圖，說如果照不到什麼，要用廿四小時的心電圖再做測試。他這下子真緊張了，他緊張了，我也緊張了……

3.  蕭醫生談論胃炎時也變凝重了，似乎覺得那麼小小的發炎，不應該這麼久都不好。他說如果再不好，就要檢查膽和胰臟……他凝重估算有其他可能，我也在無限幻想有其他可能了……

這時，我把衝到口邊的一句「我爸是胰臟癌死的」活生生的吞下去，我不想說出來，是不想醫生覺得我太緊張焦慮，還是不想把這變成有關的事實？

反正到真的要檢查時再說也可以，不用現在就擔驚受怕的亂想一通……我是這麼安慰自己的。