在youtube見到關心妍演唱會片段，忍不住睇完一首又一首歌。關心妍是我的青春啊。
關心妍一出道我就喜歡她了，她的 "Jade-1" "Jade-2" 一上市我就去買了。我看著她出道、看著她紅、看著她拿了很多新人金獎，感謝歌曲《關心……心妍》十分感動……以她的歌路和形象，能得到如此好的成績很不容易。
關心妍很多金曲，我最喜歡《關心……心妍》和《我太強》，還有唱K必點的《你有心》《蜻蜓》《放生》《無痛失戀》……關心妍出道的時候，是我工作上最困難的時候，她的聲音很高亢，但歌很慘情，很適合那時的我，聽的時候撫慰心靈，唱的時候能夠發洩。
不知什麼時候，關心妍在樂壇消失了，然後關心妍復出了，跟著又淡出了，突然又見到她二十周年演唱會。關心妍就在樂壇進進出出，喜歡她的人力量不是很強大，但喜歡她的人一直都有。二十周年演唱會，我聽到《關心……心妍》都鼻酸，歌詞真的好到肉，明知條路好難行，明知自己有點傻，但「我犯了許多錯，給我多一點時間長大，好好發揮我」。
突然間覺得好像踏入世界末日。
被打針陰影籠罩，結婚周年在照顧我的最愛，不慶祝但求他健康平安。頭痛了很久，腹瀉了很久，還有心口痛，好不容易捱過了一個月，又要害怕快來的第二第三針。乜乜乜說可以打大腿遠離心臟，我說不如打腳趾，離重要器官愈遠愈好。
長期病患唔想打針，自己身體都未搞掂，還在作戰，我選擇寧願在家寧願被困，但總有一日可能都被迫打針，又再打一場硬仗，希望我還有意志力，唔會崩潰，如果再面對一次連環痛過生仔，我唸我會想死。
剛在 Netflix 睇左 "A Christmas in Castle"，蘇格蘭好靚，又唸起 "Leap Year" 的愛爾蘭好靚。好想走，世界咁大出面咁靚，點解而家要在水深火熱裏面積極快樂？沒有能力走不了，拖住個病人，本來真係唸住在傷心的地方幸福好了，但而家真係好頂唔順，我已經好努力，點解都仲要下下迫過黎？
今天因為有新鮮蛋，就做了太陽蛋配麵包。我愛用多一點的橄欖油把蛋煎到燶邊又半熟，把蛋連埋橄欖油放在面包上，最後灑上芹鹽，正！無印嘅鯷魚包係老公嘅最愛，煙煙韌韌又有鹹香，好正。
今天真的好累了，但哄得自己好開心，雖然我破戒吃了麵粉，但有時都顧唔得咁多，痛就痛吧，心靈上的滿足也是很重要的。
要殺晒全港寵物店的一千隻倉鼠，殺埋二千隻龍貓及兔兔，各人有各人的睇法，但既然「人命都可以如草芥」，咁「小動物可以隨時犧牲」就很合理。
我大學時養過一隻倉鼠，叫「肥肥」，因為佢真係超肥。我其實很怕動物，我很怕被抓被咬，但因為見到姐姐那一對很可愛的倉鼠，我就跟著買了一隻。
肥肥本來很瘦小，但自從我買了很多零食給牠之後，牠就由早吃到晚，一直胖下去。我本來還不知道牠是癡肥了，但有一天，姐的朋友（一個養倉鼠很有經驗的女孩子）來我們家看到「肥肥」，嚇得她說從來沒見過這麼肥的倉鼠，她把肥肥放在手心，還取笑「肥肥」肥到皮肉都從的手心跌了出去，好誇張。
我買了一個大寵物屋給肥肥，有一條隧道連接閣樓，我還在屋子裏放了轉輪子。肥肥很喜歡爬上閣樓睡覺，但因為閣樓不大而牠體積又龐大，所以牠經常瞓瞓下跌咗落來，牠每次都在隧道中嚇醒再爬返上去睡覺，而我每次都驚肥肥會嚇到心臟病。
我喜歡飼養肥肥，但不敢觸碰牠，所以打掃寵物屋就成了一大問題。我買了一個膠波波，每次打掃我都先引牠離開屋子，走進波波，我再立刻關上波波的門，任由肥肥在裏面喪跑。在換木糠期間，肥肥的膠波波就在我的四周碌來碌去，好搞笑。
不過，有一天，肥肥躺在閣樓一動不動，我看毛色不對，就知道肥肥死了。我一直都很懷疑牠是肥死的，或者是睡覺時跌進隧道嚇死的。無論是哪樣，都是我照顧不善，雖然知道肥肥癡肥後，我已經沒有買零食給牠，但牠並沒有瘦下去。我一直希望肥肥並不是癡肥致死，而是安享晚年。
我養了肥肥只有幾個月，那時我沒有相機，沒有拍照，但我永遠記得肥肥又肥又黑，還有肥肥雖然肥，但經常會玩轉輪子，生鏽的輪子會發出吱吱聲，這個吱吱聲，成了我很多個早晨的鬧鐘鈴聲。肥肥，真希望我有把你照顧好。
我們現在新 loop 的歌係 33 嘅《再次PuppyLove》，之前聽 193 live 唱過都覺得幾好聽，而家睇埋個 MV 真係好掂，一睇就話「嘩好陽光檸檬茶呀！」
MV 好睇首歌入耳，33 首歌好似好易唱，但老公都覺得唔係咁易，唔知點解硬係覺得 33 有自己嘅 key 和節奏。仲有 33 嘅演技真係好正，扮含羞答答、觸電和驚驚都好搞笑。
林明禎勁可愛，老公仲讚 Candy 做得好好，仲竟然話 3妹靚過 Yoyo！而我就一直比林明禎電親。我第一時間就發現了《男人四十》和 "Lolita" 嘅暗示，無人提得我知就覺得我真係老了……當然我們都研究咗 3妹個口型好耐，我堅持 3妹係好溫柔斯文的，一定係講「正無賴」，但老公就話好似係「正X街」，轉頭 3妹就間接證實係講咗粗口啦，哈哈！最後，就係老公見到霍哥超興奮，我無睇佢頻道，但好開心 193 搵到咁多人拍佢 MV，希望 Eorror 和 193 在今年都有多d作品。
我和我老公的品味南轅北轍，我聽咗 Mirror 和 Error 咁耐，佢一直都無乜反應，例如只係話《E先生連環不幸事件》個女主角好靚同埋 locker 好戲；重有讚下《狂人日記》係首好歌但唔啱佢口味；笑過《BOSS》個 MV 好笑 Jerdan 最好睇……不過，佢偶爾都會重播某d歌曲話好聽，例如 AK 和 Ian 合唱嘅《蝸牛》，但又到我唔好這首。
叱咤過後，情況終於有變了，佢竟然鍾意咗 《Master Class》。日夜狂 loop 同跟唱，佢一唱「年輕怎麼就是錯」，我就會搭嘴「誰不解釋就恨我」，然後一齊 "lalalalala...lalalalalala...."，佢不止睇 MV 仲特別鍾意睇 live，連我都頂唔順晚晚都係睇姜濤。而家，佢發掘到《I Promise》和《人類群星閃耀時》啱佢口味，咁我終於都唔駛晚晚「偏要當一粒薑糖」了。
《全民造星4》終於完了，感受就係：造星之路未開始，等出道後再執一執，先至會係一粒星。
其實我覺得女團真係要靚、唱得、跳得，仲要有個人風格、壓得住台，散發獨有魅力。
三甲裏面的 Marf 和 Day 係我一早就睇好，Marf 好明顯係一早已經可以出道，跳舞夠 Charm，唱歌未合格，但唱適合佢音域和風格嘅歌就好OK；Day 其實愈比賽就愈暴露佢嘅不足，但都唔係好緊要，因為佢都好有自己風格，當和一班人一齊喺個台度，而大家都會覺得你係焦點，已經係好難得嘅實力。
人人而家都講女團會有邊個，我都好想知，等我又講下想仲有邊個成員，純粹係講我鍾意，並無考慮女團嘅多樣性、搵錢能力、觀眾緣……
1. Sica，我嘅摯愛，寫左篇文《再見Sica》，所以而家唔講了，睇多次 "Come on, Bad boy" 吧。
2. Winka，由佢唱 "If I Ain’t Got You" 時已經喜歡她，雖然有 d 曲風仲未能駕馭，就像《未知道》好明顯就唔啱佢。不過，Winka 好多演出都無令人失望，在《Nobody 笨珠》中唱得好又夠放，決賽唱《母系社會》夠忘我，好期待佢入團多機會作 solo 大展拳腳。
3. Ivy So，個個話佢靚其實我唔覺，但性格係幾討好，跳舞又有自己風格。人人都質疑佢嘅唱功，但我反而欣賞佢把聲。佢係唱得唔好，佢係走晒音，但佢把聲係特別嘅，而且好有感情，Ivy So 在《勞斯萊斯》中唱那幾句，係好動人的，希望佢好好學唱歌，期待佢會有首抒情歌嘅代表作。
6. Candy，其實我唔係特別鍾意 Candy 性格，但我鍾意佢嘅倔強。而且佢比我印象係喜歡抒情歌，而我又好鍾意慢歌，所以我又好期待佢會有 solo。Candy 的《紅綠燈》被視為災難，但我一聽覺得係好OK，因為 Candy 係用心唱歌，會比到人共鳴，呢樣嘢係極之重要；而佢音準又唔係真係差到好離譜，肯定有得進步。最難忘係《無忘花》，2個唱得之人 + 2個唔唱得嘅隊員 + 一首超高難度歌曲，2-2 竟然係10。竟然仲選擇純鋼琴伴奏，未開聲已佩服她們的勇敢及誠意（對比B組就會明我講乜）。她們的合作掩蓋了很多瑕疵，很多和音和編排，都睇得出呢組嘅默契。而大家想保護在死亡名單的阿蛋，睇佢哋嘅眼神和肢體動作，加埋動人嘅聲線，我都眼濕濕。
7. 3妹，無辦法，鍾意就係鍾意。唔靚、唔好聽，但就係鍾意。而且，身為經理人阿Wing竟然可以講「佢入圍我就辭職」呢句說話，咁就比3妹入圍，阿Wing你就辭職吧。
原來很多《獵魔士》的書迷，都覺得《獵魔士2》拍得很差，很多地方都偏離原著，而且支線太多，反而《獵魔士1》因較忠於原著而好睇D。
我沒有看《獵魔士》原著，不能比較，但我的喜好本身就很主流，《獵魔士2》電視劇的改編可能就是迎合主流的觀眾吧？反正就很啱我口味，但我也很有興趣睇原著，但疫情下不能去圖書館，或者搵日出書店買，《獵魔士》系列應該值得放上我的書架珍藏。
講開又講，睇左原著再看改編而失望，真的會令人憤慨又氣餒："Harry Potter", "Percy Jackson", "Game of Thrones", " Wayward Pines"……不過，還是有很多改編，改得與原著同樣出色甚至更好，以下的都是我看完電影後，特意去買或借原著去看的出色電影：
1. The Lord of the Rings
這個不用多說了，電影是經典，原著是巨著。原著的格局很宏大而描寫很細緻，天馬行空幻想豐富。電影呈現了那種氣氛和氣勢。＂The Lord of the Rings" 是我罕有地可以一看再看的電影。
2. Of Mice and Men 人鼠之間
"Of Mice and Men" 是很嚴肅的電影，看得人很沈重，很傷感。背景是美國經濟大蕭條時代，兩個摯友一起找工作，一個精明能幹，一個弱智但體格好，他們都是勤勞誠實的人，互相扶持在努力生活，生活艱苦但抱有希望，在農場工作的三天，扭轉了他們的命運。看罷令人很唏噓，久久未能釋懷。
3. Flipped 當年電影譯名：初戀
我實在太喜歡 "Flipped" 了，之前已經寫了一篇「影後感」〈Flipped: The Whole World〉，今次講改編電影，還是要再提一次。原著的男女主角視角輪流講故事，到電影的男女主角視角輪流看件事，都安排得太好了。我要講的都在之前的文章，有興趣就看我的文章吧。
4. Horse Whisperer 當年電影譯名：情深說話未曾講
我沒有看原著，但知道原著的結局，覺得電影改得很好。電影很好看，我在戲院看完還特登去買了VCD珍藏。初段小女主角雪地騎馬拍得很有氣氛，墮馬一段緊張得我喘不過氣，到後來找「馬語者」拯救愛馬其實是拯救身心受創的小女主角，一切都拍得很有愛很有情。男女主角談情戲我反而沒感，因為我覺得主線還是人與馬的關係，我因這戲認識並愛上 Scarlett Johansson，覺得這女孩子很漂亮很有性格又很好戲，果然沒多久她就紅了。
5. Everest 珠峰浩劫
講真，如果我早知這是真實故事，如果我知道結局是如此悲壯，我就不會看電影了。一隊登山隊在珠穆朗瑪峰遇山難的故事，一個（又一個）錯誤的決定，足以造成不可挽回的災難。電影拍得很真實，每每知道危險快到，我都想大喊叫他們快回頭。但事實就是「這是一齣災難紀錄片」，怎麼喊災難都會發生。看完不明白為甚麼要冒這麼大的危險去登頂？但我就是不明白，所以我立刻去借原著看，想知道究竟經驗豐富的領隊，為甚麼會疏忽了？想知道錯誤係點發生？想知道更多當中遇難的細節，想知道他們的更多更多，但愈知得多就愈心痛。我想這個小說與電影的存在，是要警示大家，不要小看大自然，不要讓錯誤重演。題外話：圖書館竟然把原著放在「旅遊書籍區」，這失誤太大。
其實還有很多改編很好的作品，但我太累了，今天就講到此。
終於看完《獵魔士2》了！真係好好睇。
因為我已看完《獵魔士1》一段時間了，試用我有限的記憶力去講講《獵魔士》究竟有多好看。
其實我看完《獵魔士1》時，覺得劇情只是普普通通，不過拍得好有氣氛，男主角Geralt 真係好靚仔，又cool又勁，還有個人人聞風喪膽的綽號「白狼」，一出場真係係威係勢。但第一季很多角色都不是太討好，好像 Geralt 情人Yennefer，一個憤怒、自私、不信任人但又會利用人嘅巫師，但竟然得到男主角的愛……又好像小母獅公主 Ciri 非常刁蠻任性，不漂亮但又舖排她是關鍵人物但又看不出她究竟有乜咁勁……這劇有好多爾虞我詐，其實好 dark，而男主角 Geralt 嘅簡單、正直、無情就變成清流，講真的，第一季整季都是在看男主角。
《獵魔士2》好睇，是因為《獵魔士1》只一個引子，用幾集去單獨介紹幾個主角，《獵魔士2》就是正文，劇情緊密了很多，大概圍繞 Ciri 變成眾人爭奪的對象，Geralt 因為「驚奇法則」不得不保護 Ciri，並協助她了解自己混沌的力量。幾個主角在第二季開始交匯，不再是我找你、你等我；我識你、你唔識我；我信你、但你玩我……第二季多了正面人性的影響（當然仲有好多人性黑暗面），人與人的互信甚至是成功的關鍵，當中有愛、有支持；有出賣、有悔過；有自省、有原諒，由最初的不信任，到交織血與淚，直至最後彼此不可分割。而當中「惡人有惡報」的安排，唔再好似第1季咁 dark 而令人可以一抒鬱結。
男主角在第二季變化頗大，Geralt 變成一個「爸爸」去保護 Ciri，不再是無情無牽掛的獵魔士了。這樣是少了一些冷酷的吸引力，簡直由冷血變成暖男……但他的能力依然強大，而不顧一切去保護 Ciri 又真的令人動容。
公主 Ciri 令人眼前一亮，第一季還是個煩人的小屁孩，第二季已經亭亭玉立，好有公主的風範，對自我很迷惘，對別人很有戒心，但全心全意相信 Geralt，也是會不顧一切去拯救 Geralt，又是很令人動容。在尋找自我時，很勇敢很有毅力，但依然有著很討厭的青少年性格：無耐性、反叛……不過總括來說，Ciri 令人很驚喜，不愧是全劇關鍵人物。
第一季的女主 Yennefer，來到第2季出場少很多，主線都去 Ciri 那裏吧。不過她的塑造是更立體了。怎樣由自私自利去到自我犧牲，她的出場救了一個又一個人（雖然有時也不是她的原意）。一步一步看著她的轉變，很難再討厭她了，只想她可以繼續當個全世界最厲害的巫師吧。
不過，《獵魔士2》精靈的加入，令我好不習慣。精靈給我的形象，就是《魔戒》裏，尊貴的存在。而《獵魔士2》的精靈，竟然像低等動物般被人類唾棄及殺害，喂唔識射箭OK丫，但都唔係乜戰鬥力都無嘛？而且精靈竟然會背信棄義及濫殺無辜，這種卑鄙的精靈，實在顛覆了我的印象。
第2季的結束，引申出更混亂的局面，全世界甚至另一個世界都要捉 Ciri，究竟 Geralt, Yennefe, Ciri 這三人組，怎樣抵擋四方八面的圍攻？而精靈發現 Ciri 的珍貴後，究竟是否真的會保護她？畢竟《獵魔士2》的精靈比我看開的精靈差太多了。
我當初唔睇《全民造星4》，係因為覺得咁多女仔一定好煩，直到Sica的出現，我就由頭睇返晒。
初時睇Sica跳唱〈心急人上〉，係有d覺得「唔係嘛？咁日系？扮日本妹？無咗自己？」但後來睇埋佢嘅既賽前訪問，就發覺這個妹妹好有唸法，明明個樣有d傻，但其實好好清楚自己要乜面對D乜，佢唔理外間既睇法，全心全意咁去追尋，佢嗰種熱血係好有感染力。
放開咗偏見，再睇佢嘅〈心急人上〉，就發現佢嘅表演並唔係咁簡單，音準節拍動作都抓得準，而且好積極，有衝勁，仲有股「一上台就去咗另一個世界」嘅投入。
到後來，Sica嗰組唱 "Come on, Bad Boy!"，Sica的高跟鞋被MIC線纏住而跌倒，佢瞬間執生用肢體動作去救場，再加埋完左評判問佢有無事，而佢又上晒身咁騷首弄姿嘅回應，都令人拍案叫絕＋捧腹大笑，佢真係一個「導演未叫cut都繼續演嘅好演員」。
Sica率真嘅性格真係好討好，覺得佢份人好簡單，想做就做。明明訪問時仲好緊張，但一上台就上晒身。通常私下與台上咁反差嘅人，都係一個成功嘅表演者，因為佢地會融入另一個世界，忘我咁表演，放開晒一切，自然會與別不同。但Sica昨天被foul了，我又唔想去睇返一堆女仔嘅《全民造星》，有好多麻煩嘢、搶嘢、拗嘢、鬥嘢、演嘢……無咗Sica歡笑嘅中和，好難再追落去。
無錯，Marf、Day和So Ching都係好睇嘅，但其實勁歌熱舞何其多，想睇呢D有好多選擇。我都係睇男團女團大嘅，要睇我可以睇返Spice Girl、安室奈美惠 with SUPER MONKEY'S, SPEED……不是勁歌熱舞就完勝，有交流有溝通有想像有共鳴，都係好緊要嘅。只有Sica比我睇到，既演繹到別人，又有豐富嘅自己。
