輕鬆一下

講吓輕鬆嘢，唔係會抑鬱。

自從上次食飯，鄰枱坐咗個趕在高鐵停駛之前返嚟嘅女人，我就唔敢再在街食飯。之後，我就變成一個全天候煮飯婆。

現在因為唔夠口罩，變咗唔出得街而要存糧；由於我好鍾意食嘢，所以一向都有存糧經驗，而這經驗就幫咗我，在這個亂世嘅情況下，識得點苦中作樂，將平凡變有趣。

一早學識咗，將蔬菜汆水急凍就可以放幾個月、抹乾淨食唔晒嘅雞蛋再放冰箱、快過期嘅麵包放雪櫃然後牛油煎香會變高級鬼佬三文治……

但係，起呢個時候，唔會再keep住買新鮮嘅嘢，就變咗買罐頭、米麵、急凍海鮮，買埋無人理嘅早餐穀麥，以及被人忽略了「填飽個肚之餘都要安慰下自己嘅即沖朱古力」，仲有唔知點解可以放咁耐嘅童年味道「莎莉蛋糕」，與及事到如今唔好再戒口要放肆去食嘅「魚手指」。

日日要規劃，早午晚餐要點變化，早餐麵包當道：牛油煎、肝醬塗、油占多、餐湯點、餐蛋治……午餐粉麵主題：廣島蠔麵、台灣拌麵、蝦麵、雲吞麵，當然唔少得廚師牌腸仔一丁……晚餐傳統米飯：茄汁豆各種煮法、白汁飯咖喱飯全部上場、日式蛋中式蛋炒蛋蒸蛋，仲搵到倉底貨嘅鹹魚去炒飯，當然最多食係我最拿手嘅粥，鹹雞、元貝、雞蛋、粟米……各式其式，最緊要係有油有鹽夠薑及放匙羹。

呢輪補貨第二多嘅竟然係海味，平時食到過期都未食完，家吓話咁快就食晒，上網買瑤柱蝦米，果然無食開嘅元貝櫻花蝦咁好味，但咁講好似好奢侈，而家仲有海味食，係一個恩賜；補貨最多嘅係醃菜，辣椒蘿蔔、辣椒腐乳、潮州橄欖菜，用來送粥太好味，當咗主菜咁狂食，結果買完又買，而且超市這類貨都無人掃，安心買唔駛同人搶亦唔駛怕搶咗人。

廁紙同米無同人搶過，反而係去買罐頭時，遇到突然一班人向我方向衝過來去搶廁紙，嚇親我老公，以為乜事要走難。到而家，一盒醫護口罩都無成功買到。

我久唔久都唸，香港而家係咪可以以物易物，有人有滴露無漂白水，有人有漂白水無滴露。我可唔可以用皇冠廁紙＋健力士面紙＋高樂士消毒紙巾＋金鳳米，換一盒醫護口罩？

Home Office是工作中

其實，大家真係要有道德。Home Office唔等於放假，係出緊糧返緊工㗎。

有無嘢做一回事，就算平時在公司無嘢做，你都要自己搵嘢做（或者扮做嘢），唔會離開崗位，隨時都要stand by家嘛。

咁點解而家香港水深火熱，Home Office係為咗控疫情、降風險、慳口罩，但呢個咁嚴肅嘅時候，會有人去咗逛街行山睇戲食飯bbq㗎呢？

我個人比較認真，就算無人知，都要對得住自己。而家都莫講話靜雞雞去玩，竟然仲將相po fb，完全違背咗基本嘅專業操守。

我知Home Office成個月真係唔知做乜好，但當我們話緊d細路仔，次次都要老師安排晒d嘢比佢哋，而佢哋完全唔識點自處嘅時候，我哋班大人正正就係最唔識規劃嗰個。你就算唔知做乜好，都要知道起碼你可以身教：有責任心。

蠢才蠢話

自律就唔會強制，強制就唔駛自律。「強制自律」是新詞嗎？你哋唔識可唔可以查下字典。靠自律，咁唔駛法律唔駛監獄啦，這真的是甚麼人才會想到這樣講？圓謊也不至於變低智吧？香港在你們手上，真係死得。

一個都不能少

睇住四萬人湧入香港，仲要趕明天凌晨前繼續湧緊嚟，真係好驚恐。

不論佢地係乜原因（掃貨、睇病還是避難）定有病無病（有咳無咳還是確診），幾萬人湧入來呢件事，好似係想毀滅香港，多過想逃離共黨。

日日睇住班無能但有權嘅人解釋唔到兼亂噏一通，真係令人嬲到噴火。再加上好多壞消息：確診確診又確診、闖關亂走講大話、一個個話罷工又無聲氣、醫護罷工無noise又復工……真係沮喪到貼地。

睇住醫護終於勇敢罷工，但最基本嘅保護都爭取唔到，仲要比人話激進威脅除牌兼屈無良心，最後幾百票之差要復工。我講唔出「辛苦晒、支持你哋」，因為佢哋唔需要明天，而好可能係即時就要近乎零裝備咁去送死。

我比唔到安慰佢哋，因為我好嬲，點解要咁犧牲？不是說好不可以再多一個謝婉雯醫生嗎？而家政府係無做過任何妥協，唔好以為假封關假強制檢疫係讓步，我唔信。香港必須封關，而醫護最需要既嘅係裝備。都唔好提保護衣了，今天不是有片證明醫護要自己排隊比錢去買口罩嗎？而家醫護咁樣復工，我點可以為佢打氣？

而家好似電影橋段「打緊仗，明知寡不敵眾，但個國王仲叫d將軍率領騎兵一齊衝過去送死。」有印象嗎？法拉墨被佢個瘋爸命令佢地衝去班魔多大軍嗰part，嗰時我已經勁唔明，做乜要班手下同你呢個「孝子忠臣」去送死啫，一拳打死個瘋爸啦！記得d村民係點送行嗎？就係送殯咁囉。

我真係好唔想醫護有咩事，我唔知佢哋有幾掙扎，但佢哋真係唔值得為咗呢個香港去奉獻自己。做醫護預咗有風險唔怕死，唔代表你真係要咁死，任何人都無權去攞人條命，要人做嘢就要先保護到d下屬。死左，又幫到邊個？有人歌頌被封英雄，除左安慰到親屬勉勵到他人，又有乜意思？一個咁傑出嘅人，應該留返條命，去造就更多生命。我知唔係人人都辭到職，但生命最緊要，即使有抱負，都要留返條命先可以實現。醫到人唔代表醫到香港，但無咗你地香港就少左一個香港人，求求醫護，要復工的，要加倍小心，救人前先救自己；另有想法的，就相信自己不用懷疑。

我是絕對相信所有醫護是無私的，因為我曾遇到的護士，會敏感地察覺病人的心靈傷痛、會不介意病人的骯髒與呻吟、會在乎病人的痛楚及流著的血、會笑著去應付艱難巨大的工作。各位醫護，要好好保護自己，香港不能沒有你。

別理會行動的成敗、香港的堪虞了，真的，先顧好自己命仔，其他的，應該由全體香港去承擔。如果照顧病人是你的天職，那麼管理自己的生命，就是你與生俱來的責任。不管是病人定市民，香港一個都不能少。

口罩荒不要成慌

昨晚hktvmall比人偷左兩萬五個口罩，我好嬲。唔係因為無左錢，而係因為我深信個賤賊偷左好多人既心血和愛，同埋生命。

我一直有跟進hktvmall入口罩情況，知道佢地花左好多時間、心力，在全世界搵口罩；我真的感受到他們不是在賺錢，而是在救亡。

今天，卓悅有更多口罩供應，連埋之前日本城，萬寧，比左好多希望我地。但是，見到愈來愈多人自製口罩，愈來愈多人一個口罩都無，令我決定先不再去排口罩。

老人、長期病患、醫護、要上班的人都比我更需要口罩。看到有人一個口罩都沒有就去排隊，我很心痛。現在，香港沒有政府，卻受控於一國，我們都要更好好保護自己，照顧好香港人。

未有口罩先花口罩

昨天，戴左一個口罩，去萬寧排口罩，排唔到。

無唔開心，但崩潰了。

成個人崩潰，不是因為買唔到口罩，而係我白白嘥咗一個口罩。

忍咗好耐，返到屋企先至喊。

今天，提起精神努力過，放棄出卓悅出屈臣氏出各大有口罩的零售了，蹲在電腦前，希望有緣撞到網店上架。

再想想今晚煮什麼給老公吃，一齊共度這難關。

老公返工了，我失眠了

我老公要返工，我真係好自責。點解我要身體差，乜都幫唔到手？佢為左要養我要供樓，唔可以請假，焗住要冒險返工。如果你有乜事，一切仲有乜意義？我好嬲自己好憎政府，搞到件事變災難。

愛在瘟疫蔓延時，本來是一套戲，點解會變成生活？我唔想咁悲壯，唔要可歌可泣，我只要平平淡淡，平平安安。

點解咁難？

政府唔好再講大話扮好人，上次打風話非緊急公務員唔駛上班，結果係大把人要爬山返工；今次話非緊急工務員唔駛返，結果係唔係都變左緊急公務員。你講就講得好聽，但下面d高官永遠都唔知你有咁決定而唔點知應對，乜叫非緊急？從來無人定義過，為左怕孭鑊，永遠就咁就齊齊返實無錯。

我好嬲我自己，如果唔係一出道就病，而家就唔駛靠我老公一個，佢就可以請假甚至即刻辭職。雖然世事無如果，但係我都好想時光倒流，由廿四歲開始從新來過，捱過一次又一次的眼流，今日就不用好似生離死別咁睇住愛人戰戰兢兢咁返工，用有限既口罩，消失於黎明之中。

祝平安回家，白頭到老，剛過了十一年，我們要牽手到一百歲。

祈禱

天父，求祢保守上班的人要平安，別染病，我們要一家人齊齊整整，度過這個難關。

Thank you, Kobe

Kobe。

我第一個愛上的籃球球員是Kobe，所以我一開始已把籃球技巧水準定得很高。我以為fade away好普通，以為入波好簡單，以為籃球拼勁就係打不死。但原來睇慣Kobe，就會睇唔慣一般人的水平。

難忘Kobe被打到鼻骨骨折加腦震盪然後戴住眼罩繼續上場打足成季，難忘Kobe扭傷仲入埋罰球先下場，難忘球隊唔知點進攻時既進攻就係交波比Kobe，難忘Kobe永不放棄成日絕殺完場前既罰球永無甩拖，難忘隊友低沈時他飛身撈波救界外救去激勵隊友，難忘他破了湖人一個個紀錄時總是謙虛地說「這只是因為自己待在同一隊隊伍中夠久」......我看過Kobe拿40分、60分、80分，他用110分努力去完成自己喜歡的事。看著Kobe，自己很難不熱血。

Kobe就是一種精神，去叫人爬起來別倒下。

三年前，Kobe退休，但我以為仲有大把機會見到佢，我仲等緊佢來香港。什麼廣告呀、宣傳呀、公益呀，一定有他的蹤影，他太有價值，不會消失。怎知道，今天Kobe死了。

今天起來，第一個消息，是Kobe死了。很傷痛很可惜，難以相信。整天，我都被一篇篇悼念文搞得很生氣。不是真心喜歡Kobe的，請不要在現在寫什麼「我並不喜歡Kobe，但......」「我喜歡xxx，但現在懷念Kobe......」「我從來就討厭湖人，但......」之類的廢話。沒有喜歡過Kobe，那你現在是要懷念什麼？請不要用別人的回憶去呃like。

現在，我鼻酸了，我曾經追著的湖人，癡迷著的Kobe，我只好寫下悼念文，去紀錄我認識的Kobe，及Kobe對我的影響。Kobe令我以為籃球就是逢人必過，逢射必入，沒有必輸，只有永不放棄。一個永遠付出所有的人，卻永遠覺得自己做得不夠；一個成就非凡的人，總是覺得做著基本。

在我的世界，沒有KOBE，就沒有NBA。Thank you, Kobe。

武漢肺炎：唔該警覺啲啦！

經歷過沙士，無人還會對武漢肺炎掉以輕心。輕視這威脅的，一是笨蛋二是奴才。

沙士當年，街上車上有誰會不戴口罩？現在為什麼搭車成車都無五個人戴？先不說有誰覺得自己唔會中、事態不緊急而無戴口罩；而現在竟然係有人因為無口罩所以無戴！2003年，從day1發現病例，大家已如臨大敵，一早買定口罩，並沒有突然大夥去搶到缺貨成個星期的情況。口罩供求固然緊張，但當時從無聽過有人因為買唔到口罩已無戴口罩出街，這個情況發生在100%受教育的已發展城市身上，實在荒謬至極。

當年上下一心齊抗sars，尤記得當時醫護隔著玻璃透過電話和家人訣別般。全部醫護緊守崗位不敢回家，為了救人趕不及穿防護去插喉，多少醫護受盡身心折磨？多少醫護因此染病逝世？我們只能感謝與悼念，從沒忘記守護著我們的天使。當時醫護沒抱怨一句，現在政府的窩囊，陷全港於危險推醫護上絕境。這時竟然沒有全港同心抗疫，要議員去高鐵抗議、醫護發動工業行動、市民要自己去撲口罩，警察卻仍然不斷在捉人。現在除了靠自己，就是靠自己。

記得當年sars停課了，現在別說停課了，連叫戴口罩都不敢。學校是傳播病菌極高危的地方，流感高峰期，一個學生染病半班被感染，老師病不停是常見的事。年紀愈小愈不懂保護自己保護他人，咳嗽噴嚏口水鼻涕齊飛。當年，在校即使小息都不離座位不離課室不除口罩，若吃東西不能說話，彼此不能交換食物，懷孕老師全部請假唔返學。現在不停課，遲早出事。一定要繼續施壓要停課，若不宣佈停課，家長都要認真考慮自行停課。無論怎樣防護，學校都是一個密集封閉的地方，傳染機會極高。豬流感停課、寒流停課，無得醫嘅武漢肺炎唔停課？

最後，當年最深刻的，是每天看公佈哪條邨有確疹，大家都像在等宣判死刑。有一天，我的同學的屋邨有確疹了，她那樣子，我永不忘。那個絕望得要死掉的感覺，好無助。看到一車車淘大居民被送去麥里浩，那個畫面，怎忘得了？香港人，回想一下2003年sars，為己為人，請戴口罩。

後記：昨天除了一小時口罩在餐廳吃飯，剛吃完想埋單，聽到鄰桌講嘢無停過的女人講：「我媽和我講，好彩你在佢封城之前搭高鐵返咗來。」我立刻戴口罩走人，但我其實應該粗口鬧佢。

唔該，武漢回來的、中國回來的、搭過高鐵的，都應該隔離自己兩星期，唔隔離要出街都唔好除口罩！我現在就要隔離自己，因為你從來不知道自己有沒有感染，也不知道旁邊的是甚麼人，唔該，唔好咁自私，我們不是中國人，我們是有公德的。

為防你忘了，送一曲〈愛是不保留〉，紀念謝婉雯醫生的電影《天作之盒》主題曲。我們當年，是怎麼的痛過，淚是怎樣流，只期望，歷史不要重演。