輕鬆一下

講吓輕鬆嘢，唔係會抑鬱。

自從上次食飯，鄰枱坐咗個趕在高鐵停駛之前返嚟嘅女人，我就唔敢再在街食飯。之後，我就變成一個全天候煮飯婆。

現在因為唔夠口罩，變咗唔出得街而要存糧；由於我好鍾意食嘢，所以一向都有存糧經驗，而這經驗就幫咗我，在這個亂世嘅情況下，識得點苦中作樂，將平凡變有趣。

一早學識咗，將蔬菜汆水急凍就可以放幾個月、抹乾淨食唔晒嘅雞蛋再放冰箱、快過期嘅麵包放雪櫃然後牛油煎香會變高級鬼佬三文治……

但係，起呢個時候，唔會再keep住買新鮮嘅嘢，就變咗買罐頭、米麵、急凍海鮮，買埋無人理嘅早餐穀麥，以及被人忽略了「填飽個肚之餘都要安慰下自己嘅即沖朱古力」，仲有唔知點解可以放咁耐嘅童年味道「莎莉蛋糕」，與及事到如今唔好再戒口要放肆去食嘅「魚手指」。

日日要規劃，早午晚餐要點變化，早餐麵包當道：牛油煎、肝醬塗、油占多、餐湯點、餐蛋治……午餐粉麵主題：廣島蠔麵、台灣拌麵、蝦麵、雲吞麵，當然唔少得廚師牌腸仔一丁……晚餐傳統米飯：茄汁豆各種煮法、白汁飯咖喱飯全部上場、日式蛋中式蛋炒蛋蒸蛋，仲搵到倉底貨嘅鹹魚去炒飯，當然最多食係我最拿手嘅粥，鹹雞、元貝、雞蛋、粟米……各式其式，最緊要係有油有鹽夠薑及放匙羹。

呢輪補貨第二多嘅竟然係海味，平時食到過期都未食完，家吓話咁快就食晒，上網買瑤柱蝦米，果然無食開嘅元貝櫻花蝦咁好味，但咁講好似好奢侈，而家仲有海味食，係一個恩賜；補貨最多嘅係醃菜，辣椒蘿蔔、辣椒腐乳、潮州橄欖菜，用來送粥太好味，當咗主菜咁狂食，結果買完又買，而且超市這類貨都無人掃，安心買唔駛同人搶亦唔駛怕搶咗人。

廁紙同米無同人搶過，反而係去買罐頭時，遇到突然一班人向我方向衝過來去搶廁紙，嚇親我老公，以為乜事要走難。到而家，一盒醫護口罩都無成功買到。

我久唔久都唸，香港而家係咪可以以物易物，有人有滴露無漂白水，有人有漂白水無滴露。我可唔可以用皇冠廁紙＋健力士面紙＋高樂士消毒紙巾＋金鳳米，換一盒醫護口罩？