屬於我的香噴噴蜜糖燕麥餅

一早起床，想用麥奶代替鮮奶做變種「肥花麥餅」，怎知買了一年的全麥粉，竟然起晒白色毛毛，發晒霉！

我已經把低筋麥粉倒進攪拌機，惟有揀過第二個食譜。我叫自己要處變不驚，終於揀好另一款健康餅，用低筋麵粉代替了全麥粉和裸麥粉，又用杏仁粉代替椰子粉，加上媽送的萄籽油，以及買了好久都未用的烘焙用蜜糖。我亂做一通之下，焗出來又幾香喎！

我想香是因為蜜糖太勁，好像上次大成功的楓樹糖餅，楓樹糖和蜜糖似乎和朱古力一樣，都是做餅界的可人兒，是零失敗的好材料。

我做餅好像學做人：如果事情不按計劃而行，我很多時都又慌又亂又忟又燥。現在，我突然間不能做肥花麥餅，竟然可以在五分鐘以內，自己配備另一些材料，做出屬於自己食譜的餅乾。今天，算是我的成長日吧？中醫話我多思慮，我是時候唔好唸咁多，橫掂好多時候唸到天衣無縫，事情還是沒按常理而行的。身體要緊，讓腦袋空白一片就好了。