吸血新世紀：義無反顧地愛

曾經想看《吸血新世紀》，因為我喜歡看吸血彊屍，也喜歡看靚仔靚女；曾經不想看這齣戲，因為知道這齣戲講的是少男少女情懷，而我深知自己已不是花樣年華。

今天終於看了，因為影碟減價。

男主角Edward是吸血彊屍，他愛Bella，但也很想吸她的血。Edward想愛不能愛，想親近不能親近，他只可以一時看著她，一時離開她；一時對她好，一時對她兇。Edward的情緒化和若即若離，令Bella有好一陣子摸不著頭腦。

但Bella坦白和主動得可愛，她毫不掩飾地把愛意說出口。她有多愛他，她多想他愛她，她說自己愛得義無反顧。這個義無反顧真的是不能回頭，因為她甚至願意變成彊屍，只為了和Edward永遠在一起。

Bella其實無乜矜持，但仍然好「得人鍾意」，因為她的愛很澎湃、專一、值得信任、去得好盡，她令人難以抗拒；Edward其實沒甚麼吸引，成日望住Bella陰笑、成日突然間出現，又偷睇Bella睡覺、成日突然抱Bella飛來飛去，但他會為了Bella同任何人、彊屍、狼人死過，他愛Bella甚於自己，這點已經令人感動。

看罷這齣戲，覺得自己幾似Bella，大家都無乜矜持，但Bella無矜持得理所當然，我就無矜持得好白痴。Edward和Bella的愛情其實幾浪漫，但是我投入不到，我不覺得飛來飛去及上樹頂拍拖好好玩。全片最感動位反而是Edward說：「難道我愛你，直到你變老也不足夠嗎？」但Bella say no。因為Bella要永恆的愛，而Edward就是因為真愛，才不能要永恆的愛。他們的矛盾是死結，但so what？他們能義無反顧地愛便夠了。

不過，這種糾纏令我覺得Bella有D麻煩，而Edward則有D婆媽。既然Edward唔想你變彊屍，你咪好好做人囉；既然Bella唔想做人，咪由得佢做彊屍囉。我真係唔知第2、3、4集係咪仲咁糾纏落去。

睇完此片其實空白一片，最深印象是Kristen Stewart比在 "Panic Room" 時漂亮多了；Robert Pattinson比在 "Harry Potter" 中醜樣多了；而狼人更肉酸。我不覺得此片好好睇，我真是老了。