吃藥快三個月感想

 醫病的過程中，最讓人忐忑的，是唔知D藥有無用。

吃了差不多三個月的新藥，大部分人藥效很好，但我沒有。我依然每天都在痛，每天都一點一滴的虛弱下去。

每次痛，我都忍不住上網找資料，究竟其他人吃了藥有什麼反應？要吃多久才有效？如果藥沒有效怎麼辦？另一些治療有什麼副作用？最重要是要多少錢？

每次痛，我都困擾一輪，好煩，好灰。

經常要努力安慰自己，真的要靠自己去調整心理，不然會崩潰。身在痛心也在痛，無了期的痛，怎撐下去？

身體稍有好轉，我都超樂觀的想：再吃三個月一定就好轉了。起碼吃半年才知效果吧？雖然很多人吃第一個月已經脫胎換骨，但我顯然不是那堆人，就不要再冀望了。

我多想有正常的生活，我的願望是正常，沒有人會明白的了吧。

病

只要不是要死了，只要還是有方法治療，多痛苦也要堅持下去。

痛麼？是很痛。藥？副作用也很痛。痛的時候，想著還有不痛的明天，祈著禱地撐過去。

這只是另一個難纏的病，別的都戰勝了，這個也不怕，有藥吃藥，沒效再想，現在不亂作猜測，徒添煩惱命會短的。

下半生突然被動地判刑，對主動計劃人生的我來說，有點殘忍啊。心裏有個洞麼，別讓遺憾留在生命裏，用別的幸福去填滿它。

夢想的生活沒有了，就過另一種生活吧，沒什麼如意不如意的，生活真的有很多種，想過哪一種就努力去實現。

做想做的事，愛想愛的人，過好每一天，是最好的應對方案。

這個病，是可以很絕望。沒得的時候，覺得很可怕；得了的時候，就會覺得死不了就行。

我不要把絕望的它帶到我身上，因為我看到還有很多正常的日子等著我去度過。

Irrfan Khan, 我喜愛的演員

Irrfan Khan死了。

Irrfan Khan的電影，我看得不多，但十分喜歡他。《少年 PI 的奇幻漂流》認識了他，《美味情書》喜歡上他，然後再回頭看《一百萬零一夜》的警察。

我看了《美味情書》很多次，一個退休人士，不經意吸引著一個美麗少婦，開放的結局，但充滿希望，無論多困難，都要踏出那一步。

在混亂的孟買混亂的生活節奏中，他有著自己的規律和哲理：「有時上錯火車反而去對車站」。他教導了接任的後輩，指引了痛苦的婦人，收穫了意外的人生。

一次送錯的午餐，一切公式都變得脫序，美麗的事情才會開始。

輕鬆一下

講吓輕鬆嘢，唔係會抑鬱。

自從上次食飯，鄰枱坐咗個趕在高鐵停駛之前返嚟嘅女人，我就唔敢再在街食飯。之後，我就變成一個全天候煮飯婆。

現在因為唔夠口罩，變咗唔出得街而要存糧；由於我好鍾意食嘢，所以一向都有存糧經驗，而這經驗就幫咗我，在這個亂世嘅情況下，識得點苦中作樂，將平凡變有趣。

一早學識咗，將蔬菜汆水急凍就可以放幾個月、抹乾淨食唔晒嘅雞蛋再放冰箱、快過期嘅麵包放雪櫃然後牛油煎香會變高級鬼佬三文治……

但係，起呢個時候，唔會再keep住買新鮮嘅嘢，就變咗買罐頭、米麵、急凍海鮮，買埋無人理嘅早餐穀麥，以及被人忽略了「填飽個肚之餘都要安慰下自己嘅即沖朱古力」，仲有唔知點解可以放咁耐嘅童年味道「莎莉蛋糕」，與及事到如今唔好再戒口要放肆去食嘅「魚手指」。

日日要規劃，早午晚餐要點變化，早餐麵包當道：牛油煎、肝醬塗、油占多、餐湯點、餐蛋治……午餐粉麵主題：廣島蠔麵、台灣拌麵、蝦麵、雲吞麵，當然唔少得廚師牌腸仔一丁……晚餐傳統米飯：茄汁豆各種煮法、白汁飯咖喱飯全部上場、日式蛋中式蛋炒蛋蒸蛋，仲搵到倉底貨嘅鹹魚去炒飯，當然最多食係我最拿手嘅粥，鹹雞、元貝、雞蛋、粟米……各式其式，最緊要係有油有鹽夠薑及放匙羹。

呢輪補貨第二多嘅竟然係海味，平時食到過期都未食完，家吓話咁快就食晒，上網買瑤柱蝦米，果然無食開嘅元貝櫻花蝦咁好味，但咁講好似好奢侈，而家仲有海味食，係一個恩賜；補貨最多嘅係醃菜，辣椒蘿蔔、辣椒腐乳、潮州橄欖菜，用來送粥太好味，當咗主菜咁狂食，結果買完又買，而且超市這類貨都無人掃，安心買唔駛同人搶亦唔駛怕搶咗人。

廁紙同米無同人搶過，反而係去買罐頭時，遇到突然一班人向我方向衝過來去搶廁紙，嚇親我老公，以為乜事要走難。到而家，一盒醫護口罩都無成功買到。

我久唔久都唸，香港而家係咪可以以物易物，有人有滴露無漂白水，有人有漂白水無滴露。我可唔可以用皇冠廁紙＋健力士面紙＋高樂士消毒紙巾＋金鳳米，換一盒醫護口罩？

Home Office是工作中

其實，大家真係要有道德。Home Office唔等於放假，係出緊糧返緊工㗎。

有無嘢做一回事，就算平時在公司無嘢做，你都要自己搵嘢做（或者扮做嘢），唔會離開崗位，隨時都要stand by家嘛。

咁點解而家香港水深火熱，Home Office係為咗控疫情、降風險、慳口罩，但呢個咁嚴肅嘅時候，會有人去咗逛街行山睇戲食飯bbq㗎呢？

我個人比較認真，就算無人知，都要對得住自己。而家都莫講話靜雞雞去玩，竟然仲將相po fb，完全違背咗基本嘅專業操守。

我知Home Office成個月真係唔知做乜好，但當我們話緊d細路仔，次次都要老師安排晒d嘢比佢哋，而佢哋完全唔識點自處嘅時候，我哋班大人正正就係最唔識規劃嗰個。你就算唔知做乜好，都要知道起碼你可以身教：有責任心。

蠢才蠢話

自律就唔會強制，強制就唔駛自律。「強制自律」是新詞嗎？你哋唔識可唔可以查下字典。靠自律，咁唔駛法律唔駛監獄啦，這真的是甚麼人才會想到這樣講？圓謊也不至於變低智吧？香港在你們手上，真係死得。

一個都不能少

睇住四萬人湧入香港，仲要趕明天凌晨前繼續湧緊嚟，真係好驚恐。

不論佢地係乜原因（掃貨、睇病還是避難）定有病無病（有咳無咳還是確診），幾萬人湧入來呢件事，好似係想毀滅香港，多過想逃離共黨。

日日睇住班無能但有權嘅人解釋唔到兼亂噏一通，真係令人嬲到噴火。再加上好多壞消息：確診確診又確診、闖關亂走講大話、一個個話罷工又無聲氣、醫護罷工無noise又復工……真係沮喪到貼地。

睇住醫護終於勇敢罷工，但最基本嘅保護都爭取唔到，仲要比人話激進威脅除牌兼屈無良心，最後幾百票之差要復工。我講唔出「辛苦晒、支持你哋」，因為佢哋唔需要明天，而好可能係即時就要近乎零裝備咁去送死。

我比唔到安慰佢哋，因為我好嬲，點解要咁犧牲？不是說好不可以再多一個謝婉雯醫生嗎？而家政府係無做過任何妥協，唔好以為假封關假強制檢疫係讓步，我唔信。香港必須封關，而醫護最需要既嘅係裝備。都唔好提保護衣了，今天不是有片證明醫護要自己排隊比錢去買口罩嗎？而家醫護咁樣復工，我點可以為佢打氣？

而家好似電影橋段「打緊仗，明知寡不敵眾，但個國王仲叫d將軍率領騎兵一齊衝過去送死。」有印象嗎？法拉墨被佢個瘋爸命令佢地衝去班魔多大軍嗰part，嗰時我已經勁唔明，做乜要班手下同你呢個「孝子忠臣」去送死啫，一拳打死個瘋爸啦！記得d村民係點送行嗎？就係送殯咁囉。

我真係好唔想醫護有咩事，我唔知佢哋有幾掙扎，但佢哋真係唔值得為咗呢個香港去奉獻自己。做醫護預咗有風險唔怕死，唔代表你真係要咁死，任何人都無權去攞人條命，要人做嘢就要先保護到d下屬。死左，又幫到邊個？有人歌頌被封英雄，除左安慰到親屬勉勵到他人，又有乜意思？一個咁傑出嘅人，應該留返條命，去造就更多生命。我知唔係人人都辭到職，但生命最緊要，即使有抱負，都要留返條命先可以實現。醫到人唔代表醫到香港，但無咗你地香港就少左一個香港人，求求醫護，要復工的，要加倍小心，救人前先救自己；另有想法的，就相信自己不用懷疑。

我是絕對相信所有醫護是無私的，因為我曾遇到的護士，會敏感地察覺病人的心靈傷痛、會不介意病人的骯髒與呻吟、會在乎病人的痛楚及流著的血、會笑著去應付艱難巨大的工作。各位醫護，要好好保護自己，香港不能沒有你。

別理會行動的成敗、香港的堪虞了，真的，先顧好自己命仔，其他的，應該由全體香港去承擔。如果照顧病人是你的天職，那麼管理自己的生命，就是你與生俱來的責任。不管是病人定市民，香港一個都不能少。

口罩荒不要成慌

昨晚hktvmall比人偷左兩萬五個口罩，我好嬲。唔係因為無左錢，而係因為我深信個賤賊偷左好多人既心血和愛，同埋生命。

我一直有跟進hktvmall入口罩情況，知道佢地花左好多時間、心力，在全世界搵口罩；我真的感受到他們不是在賺錢，而是在救亡。

今天，卓悅有更多口罩供應，連埋之前日本城，萬寧，比左好多希望我地。但是，見到愈來愈多人自製口罩，愈來愈多人一個口罩都無，令我決定先不再去排口罩。

老人、長期病患、醫護、要上班的人都比我更需要口罩。看到有人一個口罩都沒有就去排隊，我很心痛。現在，香港沒有政府，卻受控於一國，我們都要更好好保護自己，照顧好香港人。

未有口罩先花口罩

昨天，戴左一個口罩，去萬寧排口罩，排唔到。

無唔開心，但崩潰了。

成個人崩潰，不是因為買唔到口罩，而係我白白嘥咗一個口罩。

忍咗好耐，返到屋企先至喊。

今天，提起精神努力過，放棄出卓悅出屈臣氏出各大有口罩的零售了，蹲在電腦前，希望有緣撞到網店上架。

再想想今晚煮什麼給老公吃，一齊共度這難關。

老公返工了，我失眠了

我老公要返工，我真係好自責。點解我要身體差，乜都幫唔到手？佢為左要養我要供樓，唔可以請假，焗住要冒險返工。如果你有乜事，一切仲有乜意義？我好嬲自己好憎政府，搞到件事變災難。

愛在瘟疫蔓延時，本來是一套戲，點解會變成生活？我唔想咁悲壯，唔要可歌可泣，我只要平平淡淡，平平安安。

點解咁難？

政府唔好再講大話扮好人，上次打風話非緊急公務員唔駛上班，結果係大把人要爬山返工；今次話非緊急工務員唔駛返，結果係唔係都變左緊急公務員。你講就講得好聽，但下面d高官永遠都唔知你有咁決定而唔點知應對，乜叫非緊急？從來無人定義過，為左怕孭鑊，永遠就咁就齊齊返實無錯。

我好嬲我自己，如果唔係一出道就病，而家就唔駛靠我老公一個，佢就可以請假甚至即刻辭職。雖然世事無如果，但係我都好想時光倒流，由廿四歲開始從新來過，捱過一次又一次的眼流，今日就不用好似生離死別咁睇住愛人戰戰兢兢咁返工，用有限既口罩，消失於黎明之中。

祝平安回家，白頭到老，剛過了十一年，我們要牽手到一百歲。