生日周隨筆

我生日了，今年生日，十分感恩，平平安安大一歲了。

每次過生日或紀念日，我都是等到老公說「下星期我請左假啦」，我才知道又到我生日（或佢生日）或者結婚紀念。不過我一係唔記得，一知道就要以星期去慶祝，生日周、結婚紀念周，全都玩盡一星期先夠。

今年，身體太差了，生日周遲了開始，也沒能力慶祝一周，老公笑說今年慶祝生日年吧！（幸福）

行街見到紅絲絨蛋糕，忍唔住買了一個，很懷念Cedele的紅絲絨，可惜已結業；Oliver's又沒再售。香港甚麼時候再有好吃的紅絲絨？紅蘿蔔蛋糕的乾果反而有驚喜。

食完蛋糕唔夠飽，出去買Pizza食，老公被「鵝肝」吸引，只要有鵝肝，佢都唔理係鵝肝配乜都會叫，好似鵝肝漢堡、鵝肝凍批、鵝肝多士、鵝肝壽司……

老公睇中君悅High Tea外賣優惠好耐，我成日話咁遠去拿唔划算。終於在我生日時，有藉口去買來奢侈一下。來回過程真係身水身汗，不過捧住咁矜貴既High Tea真係幾過癮。返到屋企先知，竟然有我最鍾意既龍蝦及老公最鍾意既鵝肝。

生日蛋糕上場了！食開的店執左，上網一查，Rosewood還有傳統的黑森林蛋糕。但去拿那天，酒店漏左單，拿了別的給我們，不知係咪因為咁，就出事了？

我和老公滿心期待，整天沒吃東西，唸住一天吃光這個2磅的蛋糕，點知，一食，酒味呢？再食，真係無酒味喎……我們都疑心這是別人的無酒版……永遠的謎。

食左咁多日蛋糕，老公膩到投降了，求我不要再買蛋糕，於是我們改行食啫喱。因為生日我好闊佬批准老公買好貴既夕張啫喱比我食，超好吃，並發現貴價啫喱和平價啫喱的分別，開始嘴刁唔再食平嘢。

每年生日都會去行山，總覺得生日要做些平日不做的事，所以，我說我每年起碼都做左一次劇烈運動。今年，去不了離島，就到市區逛，食饗食王林記，行到腳痠痛就回家看netflix，睇完《神棄之地》就睇《路人超人100》，反差極大但都好看，太夜肚餓就叫老公煮一丁，好浮誇但真心大讚老公煮的一丁係全世界最好味的。

感恩生日周身體很健康，感恩有陪我吃喝玩樂陪我吃藥看病的人，祝自己生日快樂，大家身體健康。