痛苦中聽的聲音與音樂

之前最痛苦的時候，我會放兩種音樂，一種是大自然聲音，一個是 Selena Gomez。

痛到想死的夜晚，我會聽行雷打風大暴雨，或者聽森林小溪；我試過聽海浪或風聲，但這些不夠力量去舒緩身體正在爆發的痛苦，最不能聽小鳥叫聲，高音頻只會讓痛楚更錐心。

幸好，我現在還未痛到要聽大自然去撫慰心靈，但我已經在聽 Selena。

起初，我以為 Selena 是迪士尼小公主，甜甜的只適合青少年。但有段時間，我看了 Selena 幾套電影，開始對她有點興趣。我去找 Selena 的音樂，才發覺她的風格很對我的口味。在情緒低落而身體又極痛苦嘅情況下，Selena 的歌聲是陪伴與治癒的。Selena 本身是個很感性的人吧，所以歌曲中都帶著濃濃感情。輕快的歌曲活潑開朗，抒情的歌曲愁緒落寞，她的聲音沙啞溫柔、有力量又帶點慵懶。我很快就喜歡了 Selena，儲存了一串她的歌單。

第一首聽的是 Charles 介紹的 " We Don't Talk Anymore"，Selena 很有魅力，女人味滿瀉，唱得很好。

然後，我聽了當時的最新專輯 "Rare"，最喜歡 "Lose You to Love Me" 及 "Rare"。

作為認識 Selena 的第二首歌， "Lose You to Love Me" 是很驚喜的，黑白的拍攝，差不多像獨白的演唱，一句一句的講要愛自己，就算不知道她那段愛情，都覺得這個女孩子受傷很深，想自強自愛但仍在掙扎。

同一張大碟，相反風格的 "Rare" 又是另一個驚喜，MV 絢麗精彩，仍是講自愛，要肯定自己的獨特，但即使 MV 多麼彩色，Selena 多麼的漂亮，這首歌仍然滲出一絲無力。一個撐過了的人，不會把我要努力掛在口邊。不過，我明白她為什麼這樣做，也希望她能真正相信自己的 rare。她的 "Rare"，真的很 special。

"It Ain't Me" 是我瘋狂循環的歌曲， 那時我才剛聽 Selena 的歌，很驚訝她能唱得這麼好，我那時還不相信是 Selena 唱的，太有 power 太有勁了。這首歌讓我認識了 Kygo，很出色的挪威音樂人。我和 Charles 一起看 MV，故事很有意思，看完腦內會浮起：莊周夢蝶？

後來，我聽到這首《漢娜的遺言2》的主題曲 "Only You"。我看過《漢娜的遺言》，但實在不能理解它的概念，沒看下去。不過，"Only You" 確實很有電視劇那般遺憾的味道，能把人帶到故事裏面，想去重溫一次電視劇。

Selena 快慢歌都掌握得很好，"Slow Down" 是一首節奏很強的歌。我大痛的時候，聽著她的輕快跳脫，抓節拍抓得準唱得中，我也想跟著嗌，Slow! Slow! 痛楚過後再聽，仍然想跟著跳舞開 party，很喜歡快樂的 Selena，一個可愛的女孩子。

原來 Selena 組了樂隊 Selena Gomez & The Scene，而且歌曲很不錯。我第一首聽的是 "Naturally"，覺得這首歌好 young、大路，但入耳好聽，而且歌曲的 bridge 好正好有Selena 風格。

 

"My Dilemma"，一首我非常喜歡的歌曲。Selena 聲音其實很甜，但 "My Dilemma" 的甜帶著憤怒和迷惘，聽得出 Selena 是很需要愛情的人。聽了 Selena 這麼多的歌，發覺她很需要透過歌曲來抒發情緒。但她寫了這麼多詞、唱了這麼多年、流過這麼多淚、經歷了這麼多痛苦。有時，就放過自己吧。要忘了，就忘了吧……想愛自己，就去愛吧……別困住自己。祝Selena身心健康，過得快樂。

改乜藥丫痛死我

這個星期痛到生不如死，換咗個醫生，換咗隻藥，但係痛到一年前未醫時咁痛，食埋非類固醇止痛藥都仲係頂唔順，但因為有這些痛的經驗，已經唔會好似以前咁唸駛唔駛call白車。

痛到第二晚決定唔等多四天（因為醫囑係停七天再吃第二盒藥），自己膽粗粗攞返之前食開又食剩嘅藥來吃。其實我都唔知係隻藥食好轉咗，定係原來事情就會咁發展。總之，我由九級痛，每天降一級痛，終於到現在能坐定定寫返篇文。

不過，上次食呢隻藥，令我半年重30磅，停藥半年終於見返個鎖骨，現在我又開始要食返佢。如果隻藥係有用，我肥都肥得抵。如果連佢都無用，我又會陷入絕望嘅輪迴。

老公偶遇MIRROR張相

老公去朗豪坊買三文治比病病哋嘅我，我在家等食點知收到呢幾張相，嚇到我彈起。

但我都好肯定佢知我鍾意邊個㗎喎，做乜影單人Jeremy比我？唔通佢原來唔係咁了解我？原來佢話因為好難影晒全部人，點影都會漏咗Jeremy，所以就單影一張。好開心老公在街見到MIRROR都走去避開晒D人影勻12個人比我，呢個心意真係好Sweet。

雖然老公影嘅係背面，但我覺得仲靚過正面。謝謝老公！

我最愛Mirror的三首歌

我好遲先鍾意Mirror，但我已經愛上咗Mirror。

我以前覺得如果睇一隊咁韓風的男團，咁我不如直接睇韓團。直至身邊的人和事都提及Mirror，我開始覺得身為香港人點可以唔支持香港樂壇，於是就把Mirror和成員Solo的歌都聽一遍，然後……而家成日比老公話我係鏡粉。

我第一首聽的Mirror是《IGNITED》。點解揀呢首？因為唔識讀個歌名囉，點知聽完成首都係唔識，因為根本無唱到……而且仲多左個唔識嘅中文字「焫」，中文系嘅我認真汗顏。老公好鍾意呢首歌，話好洗腦，我和老公有一排都成日哼起「焫焫焫焫焫焫」著（其實到而家都周不時會哼），然後爭論係六個「焫」定係七個「焫」。

我比較鍾意節奏快d嘅Too Hot To Handle Version。

叱咤Funky Version的live

鍾意左《IGNITED》之後，我就繼續尋找Mirror好聽嘅歌，《WARRIOR》係最令我另眼相看的一首，好本土，好熱血。姑不論「戰士」意指什麼，在這時能寫出能唱出這些詞，有邊個香港人唔會對呢首歌有共鳴，唔會為此鼓掌？

大家都說《WARRIOR》MV最出彩的是Tiger和Jeremy，Tiger仔個「大鵬展翅」同埋轉場後「類似耍太極嗰一嘢」當然好吸睛；但一開首Anson Lo「雕像活化」一震個下，和轉場後 AK 個勁到手震嘅shot，效果真係好正。一首咁有力名叫「戰士」嘅歌，好有感染力。當我在香港覺得無力的時候，就會係咁repeat首歌，睇住班「細路」奮鬥，自然就會無咁灰。

"ONE &ALL" 演唱會的版本睇得好清楚，十二個人點跳點走位，正到痺。

我最鍾意Mirror嘅歌係《BOSS》。真係估佢唔到，Mirror竟然咁多元化，一班賣型嘅男仔，竟然去唱一首百老匯feel嘅歌，首歌好歡樂，而且更突出每個人嘅特色。MV雖然好破格，但亦有不足，導演話呢首歌跳得最出色係Tiger，因為佢拉丁嘅底好啱呢首歌，但MV其實唔多影到佢。而且，要因應戲劇性而減少對嘴鏡頭，但這首歌偏偏很多獨唱句，我耳仔不靈，有起碼一半都唔知係邊個唱，到睇live版本先知，呢句唱得咁好嘅「痛快到欠理智更好」原來係Tiger，「低音可捲起長袍」原來係AK、咁好feel既「有假也懶請假」原來有句係Ian唱。其實要分辨Mirror歌的詞係邊個唱真係唔容易，有時得一句甚至得兩隻字，Mirror裏面聲音較有辨識度的，有姜濤、Jer、Jeremy、AL、Ian；其他人你唔比鏡頭，真係好難肯定係佢唱。

唔知Mirror幾時會再出團歌，好期待佢哋嘅下首歌，唔知係咩風格，邊個成員又再比人驚喜？而家有幾個成員特別忙，唔知幾時先齊人。有些成員確實可以獨當一面，但係齊人嘅Mirror，始終比Solo有凝聚力，希望Mirror人人發展都好，但希望Mirror齊人仲好。

眼淚停不下來，因為你是我的唯一

昨天去送機，未出門口已經喊到眼紅紅，送完機當晚失眠又喊到眼腫腫。要送別一個相處了幾十年的親人，怎可以輕輕的來輕輕的去？很久之前就知道她要走，但未到那一刻都不知道原來這麼捨不得。每個人都說當去旅行好快就見，但其實每個人都知道日後未必會再見。

本來，大家都成家立室後，已經不常見面，我甚至連whatsapp都不常回覆，反正都是聊生活鎖事而已，很多時不方便回覆就擱下，久而久之就忘了。所以，我沒把這當成離別，而是認為她去追求更好的生活，我會替她高興，就這而已。

但送機的日子來到，離愁別緒就湧上來了，我也說不出為什麼總是在哭，出門前特意去挑選和她一起買的衣服、戴上她替我買的耳環，就這麼兩件事都可以讓我哭得一塌糊塗。媽警告我不要把她也惹哭，機場變成一個可怕的地方，我一直在忍著眼淚，避談敏感話題，但凡鼻一酸就趕緊深呼吸，是誰說離境前要攬一攬？一攬就淚崩，但姐說要抱抱，抱就抱吧，不抱就不能再抱，淚要崩就崩吧。

當晚就失眠了，一直想姐不在了就不停哭。我不明白幾十歲人，為甚麼會這麼黏姐。第二早醒來還在哭，心裏一股空虛，才發現自己這麼會哭，是因為感覺被留下來了。但我從小就不黏姐呀，小學沒黏過，中學沒黏過，同一所大學唸書還是沒黏過，工作後各自有宿舍互不相干似的，之後大家都結婚了又住到天南地北，我們人生好像沒怎麼交雜過。

我以為自己會很看得開，我身體不好長時間都宅在家，連在香港都可以幾個月不見，在香港whatsapp和在外國whatsapp會有分別嗎？沒有。我真的不覺得移民會讓我感覺她有離開過一樣。

但原來我是一個大笨蛋，我的空虛感告訴我：你不是自以為的那麼獨立。即使我多麼覺得自己不需要姐，姐其實都陪我度過很多重要時刻，她參與了我的快樂與哀愁。小時候我哭她幫我擦眼淚、小學時我們一起當口風琴隊隊長、中學時每天一起上學、大學時我跟著她的步伐去報她讀過的學科和跟過的老師、結婚時大家幫對方揀婚紗晚裝、還有只有姐妹才能分擔的失去父親之痛；儘管我們愈來愈少一起慶祝生日、儘管上一次一起去看聖誕燈飾已經是2008年的事、儘管我們已不知多久沒再講心事。但我仍控制不住我的眼淚，四十年的陪伴原來已在心裏烙下一條又長又深的路。傷感不是因為不可以得閒就問下：「出來食Tea丫？去Donki買餸丫？去宜家行下丫？」傷感是因為現在就算想找人出來嗌下交，都已經不可能。如果時間可以倒流，我在得知她有走的打算時，會自私d講一句：「唔好走啦！好無？」而不是扮體貼的講：「好丫，去過自己想過的生活吧！」我要做一個真正的妹妹，去耍賴、撒嬌、依賴人。

好姐姐，你是我的唯一，我衷心祝福你要幸福快樂，能過夢想的生活，帶著我們的回憶，畫出有海有草有河有森林的新生活。你的妹妹，會乖乖的等待再見的一天。

.......... .......... .......... .......... .

好了，別哭了。

良性！加油！

等咗咁耐，終於等到個良性嘅結果。

前兩天收到報告，成篇都係唔識嘅英文，用埋google翻譯都係睇唔明，D文字描述得有點恐怖，喺醫生兩天都未覆的情況下，我就係咁擔驚受怕失眠發噩夢咗兩日兩夜。不停唸如果要進一步檢查或者做手術，應該用全副身家去私家定係順應天命排政府？或者命不久矣時，我應該係去玩去食定係用晒D時間黐住屋企人度過？

今天終於有結果，水蛇春咁長嘅專業描述，醫生只用四字概括：「良性XX」。我唔理個檢查有幾準確個結果有幾詳細了，良性唔死得就好。前兩天等待時覺得大難將至，即刻放肆食咗兩件凍冰冰嘅忌廉蛋糕；現在明天還有希望，想慶祝但都要好好保重，聽首歌輕鬆下笑下繼續養生，繼續努力與疾病戰鬥。近來聽首歌有句歌詞係「變了做志氣Bite」，我雖然唔明，但志氣一定係好嘢，大家加油！

開心喪癲嘅《殺死我的經理人》

唔開心嘅時候，聽《殺死我的經理人》真係好過癮。聽住花姐話「我死梗啦今次我死梗啦」「我炒晒你地班X街呀」；睇住花姐成日賞人一巴掌，真係好爽。

我好鍾意193好鍾意阿Dee好鍾意花姐，睇住佢地受苦係笑得落但真心覺得慘。但我廿幾歲時都好想跳傘玩笨豬跳去鬼屋亦唸過去森林食蟲，好羨慕佢地玩嗰D機動遊戲但好噁心要食屎。花姐和Error做晒我曾經想做嘅嘢，而咁大年紀嘅花姐竟然都可以玩埋一份兼少女心偶爾爆發，《花姐Error遊》絕對係比你有回憶有憧憬又有熱血激情既節目。

主題曲《殺死我的經理人》MV一次過重溫嗰種快感，忘記呢個世界忘記所有傷痕，喪喪癲癲盡情衝刺。

痛到暈低既盲抽檢查

在診所做了個抽樣檢查，痛到叫，痛到震，痛到腳軟。

以前我仲有份工時，醫生一叫我入院做檢查，我想都不想就答應兼揀埋日期，兩日後就躺在浸會病床檢查晒兼有埋結果；現在我身為全職病人，變成考慮三秒就放棄入院照鏡，而選擇勁痛但平（不止）一點的檢查，覺得有咩未痛過？就叫醫生「你來吧」。

做完才醒起，這個抽樣檢查叫盲抽，不是最好的檢查方法，做左都無100% sure既檢查結果？

由頭到腳都檢查過的我，自以為經驗豐富，深明比錢與比少d錢嘅分別、麻唔麻醉嘅分別、私家與政府嘅分別。但百密一疏，只唸住「窮人係要捱下痛㗎啦」，而忘了考量檢查本質的優劣。例子：照過勁辛苦的腸造影幾年後，去專科做腸鏡時醫生說：「腸造影無用㗎喎，根本照唔到病變。」我先知白捱一場。希望今次並不如此，盲抽都有個值得有嘅結果。

係女人都好肥

係咪任何年齡的女人，都係覺得自己好肥？

昨天，我在馬莎睇特價衫時，興致勃勃地找到寬身遮肚衫，正在欣賞之際，旁邊有個女人和她的朋友講：「呢件啱我呀，啱我身材。」我好奇一望，點知係個瘦到無肉既婆婆，不要講肚腩了，連少少bye bye肉都無。唔該睇下，挺住個大肚腩嗰個係我，佢d咁fit既身形，根本就唔駛唸任何闊身衫，除非你話特別鍾意佢舒服啫，如果唔係，著返fit身衫係型好多㗎。

係咪任何年齡的女人，都係覺得自己好肥？當然不是，想當年我十幾廿幾歲，無覺得自己肥，衣服都是窄身衫：黑、白、紅、藍、綠，乜色都carry到。而家唸返，都慶幸自己曾經幸福過：乜款都買得，乜色都OK，唔駛唸唔啱唔身，只需要一句鍾意就得，因為一定都好睇。

係咪任何年齡的女人，都係覺得自己好肥？當然不是，但又有多少真正認識自己的人？

我好煩

身體狀況時好時壞，病癥一又來，情緒就跌落谷底；病癥沒有來，整個人就開心到飛天。不想心理被生理支配，但很難無視生理狀況的變壞，經常被它牽著走，時常提醒我我隨時病發；但最可恨是：情緒不好又會直接令身體更差更不穩定，整個人像陷入消極漩渦。

戒左廿年口，唔想再戒都要再戒。本來想快活過人生，想做什麼就做什麼，但敵不過唔想病唔想痛唔想睇醫生，要跟想吃的說「再見」，也跟想過的正常日子講「遲D先見」。