我最愛Mirror的三首歌

我好遲先鍾意Mirror，但我已經愛上咗Mirror。

我以前覺得如果睇一隊咁韓風的男團，咁我不如直接睇韓團。直至身邊的人和事都提及Mirror，我開始覺得身為香港人點可以唔支持香港樂壇，於是就把Mirror和成員Solo的歌都聽一遍，然後……而家成日比老公話我係鏡粉。

我第一首聽的Mirror是《IGNITED》。點解揀呢首？因為唔識讀個歌名囉，點知聽完成首都係唔識，因為根本無唱到……而且仲多左個唔識嘅中文字「焫」，中文系嘅我認真汗顏。老公好鍾意呢首歌，話好洗腦，我和老公有一排都成日哼起「焫焫焫焫焫焫」著（其實到而家都周不時會哼），然後爭論係六個「焫」定係七個「焫」。

我比較鍾意節奏快d嘅Too Hot To Handle Version。

叱咤Funky Version的live

鍾意左《IGNITED》之後，我就繼續尋找Mirror好聽嘅歌，《WARRIOR》係最令我另眼相看的一首，好本土，好熱血。姑不論「戰士」意指什麼，在這時能寫出能唱出這些詞，有邊個香港人唔會對呢首歌有共鳴，唔會為此鼓掌？

大家都說《WARRIOR》MV最出彩的是Tiger和Jeremy，Tiger仔個「大鵬展翅」同埋轉場後「類似耍太極嗰一嘢」當然好吸睛；但一開首Anson Lo「雕像活化」一震個下，和轉場後 AK 個勁到手震嘅shot，效果真係好正。一首咁有力名叫「戰士」嘅歌，好有感染力。當我在香港覺得無力的時候，就會係咁repeat首歌，睇住班「細路」奮鬥，自然就會無咁灰。

"ONE &ALL" 演唱會的版本睇得好清楚，十二個人點跳點走位，正到痺。

我最鍾意Mirror嘅歌係《BOSS》。真係估佢唔到，Mirror竟然咁多元化，一班賣型嘅男仔，竟然去唱一首百老匯feel嘅歌，首歌好歡樂，而且更突出每個人嘅特色。MV雖然好破格，但亦有不足，導演話呢首歌跳得最出色係Tiger，因為佢拉丁嘅底好啱呢首歌，但MV其實唔多影到佢。而且，要因應戲劇性而減少對嘴鏡頭，但這首歌偏偏很多獨唱句，我耳仔不靈，有起碼一半都唔知係邊個唱，到睇live版本先知，呢句唱得咁好嘅「痛快到欠理智更好」原來係Tiger，「低音可捲起長袍」原來係AK、咁好feel既「有假也懶請假」原來有句係Ian唱。其實要分辨Mirror歌的詞係邊個唱真係唔容易，有時得一句甚至得兩隻字，Mirror裏面聲音較有辨識度的，有姜濤、Jer、Jeremy、AL、Ian；其他人你唔比鏡頭，真係好難肯定係佢唱。

唔知Mirror幾時會再出團歌，好期待佢哋嘅下首歌，唔知係咩風格，邊個成員又再比人驚喜？而家有幾個成員特別忙，唔知幾時先齊人。有些成員確實可以獨當一面，但係齊人嘅Mirror，始終比Solo有凝聚力，希望Mirror人人發展都好，但希望Mirror齊人仲好。

眼淚停不下來，因為你是我的唯一

昨天去送機，未出門口已經喊到眼紅紅，送完機當晚失眠又喊到眼腫腫。要送別一個相處了幾十年的親人，怎可以輕輕的來輕輕的去？很久之前就知道她要走，但未到那一刻都不知道原來這麼捨不得。每個人都說當去旅行好快就見，但其實每個人都知道日後未必會再見。

本來，大家都成家立室後，已經不常見面，我甚至連whatsapp都不常回覆，反正都是聊生活鎖事而已，很多時不方便回覆就擱下，久而久之就忘了。所以，我沒把這當成離別，而是認為她去追求更好的生活，我會替她高興，就這而已。

但送機的日子來到，離愁別緒就湧上來了，我也說不出為什麼總是在哭，出門前特意去挑選和她一起買的衣服、戴上她替我買的耳環，就這麼兩件事都可以讓我哭得一塌糊塗。媽警告我不要把她也惹哭，機場變成一個可怕的地方，我一直在忍著眼淚，避談敏感話題，但凡鼻一酸就趕緊深呼吸，是誰說離境前要攬一攬？一攬就淚崩，但姐說要抱抱，抱就抱吧，不抱就不能再抱，淚要崩就崩吧。

當晚就失眠了，一直想姐不在了就不停哭。我不明白幾十歲人，為甚麼會這麼黏姐。第二早醒來還在哭，心裏一股空虛，才發現自己這麼會哭，是因為感覺被留下來了。但我從小就不黏姐呀，小學沒黏過，中學沒黏過，同一所大學唸書還是沒黏過，工作後各自有宿舍互不相干似的，之後大家都結婚了又住到天南地北，我們人生好像沒怎麼交雜過。

我以為自己會很看得開，我身體不好長時間都宅在家，連在香港都可以幾個月不見，在香港whatsapp和在外國whatsapp會有分別嗎？沒有。我真的不覺得移民會讓我感覺她有離開過一樣。

但原來我是一個大笨蛋，我的空虛感告訴我：你不是自以為的那麼獨立。即使我多麼覺得自己不需要姐，姐其實都陪我度過很多重要時刻，她參與了我的快樂與哀愁。小時候我哭她幫我擦眼淚、小學時我們一起當口風琴隊隊長、中學時每天一起上學、大學時我跟著她的步伐去報她讀過的學科和跟過的老師、結婚時大家幫對方揀婚紗晚裝、還有只有姐妹才能分擔的失去父親之痛；儘管我們愈來愈少一起慶祝生日、儘管上一次一起去看聖誕燈飾已經是2008年的事、儘管我們已不知多久沒再講心事。但我仍控制不住我的眼淚，四十年的陪伴原來已在心裏烙下一條又長又深的路。傷感不是因為不可以得閒就問下：「出來食Tea丫？去Donki買餸丫？去宜家行下丫？」傷感是因為現在就算想找人出來嗌下交，都已經不可能。如果時間可以倒流，我在得知她有走的打算時，會自私d講一句：「唔好走啦！好無？」而不是扮體貼的講：「好丫，去過自己想過的生活吧！」我要做一個真正的妹妹，去耍賴、撒嬌、依賴人。

好姐姐，你是我的唯一，我衷心祝福你要幸福快樂，能過夢想的生活，帶著我們的回憶，畫出有海有草有河有森林的新生活。你的妹妹，會乖乖的等待再見的一天。

.......... .......... .......... .......... .

好了，別哭了。

良性！加油！

等咗咁耐，終於等到個良性嘅結果。

前兩天收到報告，成篇都係唔識嘅英文，用埋google翻譯都係睇唔明，D文字描述得有點恐怖，喺醫生兩天都未覆的情況下，我就係咁擔驚受怕失眠發噩夢咗兩日兩夜。不停唸如果要進一步檢查或者做手術，應該用全副身家去私家定係順應天命排政府？或者命不久矣時，我應該係去玩去食定係用晒D時間黐住屋企人度過？

今天終於有結果，水蛇春咁長嘅專業描述，醫生只用四字概括：「良性XX」。我唔理個檢查有幾準確個結果有幾詳細了，良性唔死得就好。前兩天等待時覺得大難將至，即刻放肆食咗兩件凍冰冰嘅忌廉蛋糕；現在明天還有希望，想慶祝但都要好好保重，聽首歌輕鬆下笑下繼續養生，繼續努力與疾病戰鬥。近來聽首歌有句歌詞係「變了做志氣Bite」，我雖然唔明，但志氣一定係好嘢，大家加油！

開心喪癲嘅《殺死我的經理人》

唔開心嘅時候，聽《殺死我的經理人》真係好過癮。聽住花姐話「我死梗啦今次我死梗啦」「我炒晒你地班X街呀」；睇住花姐成日賞人一巴掌，真係好爽。

我好鍾意193好鍾意阿Dee好鍾意花姐，睇住佢地受苦係笑得落但真心覺得慘。但我廿幾歲時都好想跳傘玩笨豬跳去鬼屋亦唸過去森林食蟲，好羨慕佢地玩嗰D機動遊戲但好噁心要食屎。花姐和Error做晒我曾經想做嘅嘢，而咁大年紀嘅花姐竟然都可以玩埋一份兼少女心偶爾爆發，《花姐Error遊》絕對係比你有回憶有憧憬又有熱血激情既節目。

主題曲《殺死我的經理人》MV一次過重溫嗰種快感，忘記呢個世界忘記所有傷痕，喪喪癲癲盡情衝刺。

痛到暈低既盲抽檢查

在診所做了個抽樣檢查，痛到叫，痛到震，痛到腳軟。

以前我仲有份工時，醫生一叫我入院做檢查，我想都不想就答應兼揀埋日期，兩日後就躺在浸會病床檢查晒兼有埋結果；現在我身為全職病人，變成考慮三秒就放棄入院照鏡，而選擇勁痛但平（不止）一點的檢查，覺得有咩未痛過？就叫醫生「你來吧」。

做完才醒起，這個抽樣檢查叫盲抽，不是最好的檢查方法，做左都無100% sure既檢查結果？

由頭到腳都檢查過的我，自以為經驗豐富，深明比錢與比少d錢嘅分別、麻唔麻醉嘅分別、私家與政府嘅分別。但百密一疏，只唸住「窮人係要捱下痛㗎啦」，而忘了考量檢查本質的優劣。例子：照過勁辛苦的腸造影幾年後，去專科做腸鏡時醫生說：「腸造影無用㗎喎，根本照唔到病變。」我先知白捱一場。希望今次並不如此，盲抽都有個值得有嘅結果。

係女人都好肥

係咪任何年齡的女人，都係覺得自己好肥？

昨天，我在馬莎睇特價衫時，興致勃勃地找到寬身遮肚衫，正在欣賞之際，旁邊有個女人和她的朋友講：「呢件啱我呀，啱我身材。」我好奇一望，點知係個瘦到無肉既婆婆，不要講肚腩了，連少少bye bye肉都無。唔該睇下，挺住個大肚腩嗰個係我，佢d咁fit既身形，根本就唔駛唸任何闊身衫，除非你話特別鍾意佢舒服啫，如果唔係，著返fit身衫係型好多㗎。

係咪任何年齡的女人，都係覺得自己好肥？當然不是，想當年我十幾廿幾歲，無覺得自己肥，衣服都是窄身衫：黑、白、紅、藍、綠，乜色都carry到。而家唸返，都慶幸自己曾經幸福過：乜款都買得，乜色都OK，唔駛唸唔啱唔身，只需要一句鍾意就得，因為一定都好睇。

係咪任何年齡的女人，都係覺得自己好肥？當然不是，但又有多少真正認識自己的人？

我好煩

身體狀況時好時壞，病癥一又來，情緒就跌落谷底；病癥沒有來，整個人就開心到飛天。不想心理被生理支配，但很難無視生理狀況的變壞，經常被它牽著走，時常提醒我我隨時病發；但最可恨是：情緒不好又會直接令身體更差更不穩定，整個人像陷入消極漩渦。

戒左廿年口，唔想再戒都要再戒。本來想快活過人生，想做什麼就做什麼，但敵不過唔想病唔想痛唔想睇醫生，要跟想吃的說「再見」，也跟想過的正常日子講「遲D先見」。

等了超久的《機智醫生生活2》

 《機智醫生生活2》終於播啦！我終於等到了！但是，雖然今天開播，但我還是不可以看啊！

自從經歷過《羽毛球少年團》每周追劇的痛苦，我就決定不會再以「等」的方式去追韓劇了。這太痛苦了！現在我看劇都是：第一集都未完就不喜歡的就直接棄劇；能看完第一集的，都以幾晚通宵的狂妄去追完。

所以，《機智醫生生活2》還要再等等等好久，才可以開始看，心真的好癢……但心癢比痛苦好，還是得忍下去。

又看《魔戒》的感悟：偏偏是我（們）

 我又翻睇《魔戒》，上次紀錄甘道夫名言，今次紀錄Frodo的。

首部曲尾聲，Frodo將要離開大隊孤身上路時，捧著魔戒很是感觸，想到「真希望魔戒不在我手上，真希望這一切都沒發生。每個遇上這種時代的人都這麼想，但是命運不由人，我們只能決定要怎麼去面對時代的考驗。」

以前，我因為不喜歡Frodo，就漠視了他的心聲。現在，我開始明白Frodo的感受了：為何偏偏選中我？

我從未想過，我們這一代，會是歷史的一頁。我中學讀大躍進、文革、六四覺得匪而所思，看余華看得津津有味，但全都當作歷史故事，完全事不關己。因為我在香港。

但是，現在我在的時代，肯定是歷史的一章了。我會感嘆，為什麼偏偏是這個時代？

以前我最不滿的，就只是普教中、系統性評估、課程改革、自評外評；取笑專題研習周、全方位學習、跨學科課題……但我總是上有政策下有對策的，普教中？可以呀，我用普通話講完再用廣東話講，儘管我的考核寫著「不是全普授課，夾雜廣東話。」但我仍然選擇做對的事情，我唔怕比你知，就是要做我自己。我有憤怒但沒有氣餒，總在我不能控制的大環境下盡我最大的能力，若果連我都不做，他們的機會就更少。

現在，Frodo所說的「我們只能決定要怎麼去面對時代的考驗。」還能做到嗎？我都開始死心了，開始想由它去了。我除了要生活得好好的，還可以怎面對時代的考驗？我沒走只因為我走不了，但既然我在這，我就要保存香港人的精神，多一點就多一滴，希望日後姪女大了，我仍可以跟她們回顧以前的香港。

連Frodo都可以揹著魔戒去魔多，我們也（心）死不了的。

我的鎖骨不見了

 突然想起一件事，之前小儀被笑肥到無鎖骨，我一直奇怪點解咁講笑的？怎會有人無鎖骨？點知我好奇去照鏡，OMG! 我的鎖骨呢？

唉，鎖骨不見了，這真是我的血淚史一路走來的證明。

睇返以前D相，我的鎖骨超明顯，而且是一大條，沒法子，滿清人血統，我的骨架就是大。但我的骨什麼時候都被肥肉包得緊緊的，由骨感變成圓潤？

想當然矣，就是因為荷蒙爾藥。

醫生開藥那時，講明副作用係肥。我仲鬆一大口氣，話：「哦，肥啫，我以為會死（因為聽聞蒙爾蒙藥易血栓）。」當時，第一要務係止痛止血，肥根本唔駛理。點知吃藥三個月，肥咗幾十磅，而家，減肥變咗我人生目標咁滯。

先不論肥咗唔靚女，有肚腩，大腿左右搖，衣服全扔買大兩個碼，方臉變圓臉，連床褥都被我瞓凹。再來肥會令婦科病更病，脂肪對子宮超有害，所以即使點唔舒服點懶，都要郁下手腳增加血液循環。

今天，我睇返十幾年嘅相，驚嘆我以前原來係咁嘅樣，點解以前唔駛化妝都有輪廓㗎呢？而家打晒陰影都係一個大餅臉？這股動力，叫我不止要為咗健康去減肥，還要為咗變靚D，唔駛怕自己膚淺，靚女真係人都開心D，當然，這建基於「我要健康，我要過正常生活」的大前題下。