生日大餐

生日正日沒甚麼胃口，又夜又累，想找間附近的餐廳，就是Beans了！

首先，老公唸住食好Ｄ，竟然話要加錢叫湯，他叫了我最愛的海鮮龍蝦湯，我替他叫了紅酒牛湯。

好多時一些有酒的菜式都係得個講字，根本吃不出來，想不過這個紅酒牛湯，一飲真係好有酒味，麵包吃得出來是酸種。

那晚不太餓，就點了賓尼迪蛋，麵包烘得好香脆，所有嘢都配搭OK。海鮮龍蝦湯裏面有蜆和蝦，都係有鮮味唔會太鹹，下次餐湯可能試埋牛肝菌湯，應該都好足料。

另一款主菜要了石斑，Hollandaise sauce 好足夠，但好似 Odelice! 整得濃郁一點。石斑煎得好好，外面脆裏面仲係濕潤。上面的醃洋葱太酸我吃不了，但老公好喜歡。炒羽衣甘藍好香蒜蓉味，好中式炒菜feel好吃。薯蓉就一如以往好滑和香牛油味。Good。

加錢要了一杯香蕉朱古力奶昔，和 Five Guys 的好唔同，呢杯係清爽好多同埋勁唔甜，極懷疑佢無用雪糕，甚至係用脫脂奶？食得出加了新鮮香蕉，朱古力係脆片，似黑朱古力，初初覺得好淡口，但飲落覺得無負擔，以後去Beans都會叫。

生日周幾頓大餐＝好心情幾級跳

生日飯第一餐去了Cheesecake Factory，吃了最喜歡的 RENEE’S SPECIAL 和 WARM CRAB & ARTICHOKE DIP。疫情時和現在去 Cheesecake Factory 感受很不同：疫情時成間店無乜人，靜又舒服；現在好多人，好嘈吵枱又逼了。最慘是 RENEE’S SPECIAL 再不是周打蜆湯了……

第二餐是 Flat Iron Burger。本來吃 Shake Shack 已很滿足的我，推了幾次都沒甚興致去 Flat Iron。一次下雨天終於提起心肝去了，怎知道真係好驚喜！

Flat Iron Burger 價錢和 Five Guys 差不多（只貴少少啦），但質素差好遠，不明白 Five Guys 怎麼敢收這個價。

Flat Iron Burger 最好吃係個包和酸瓜，麵包真的烘得好香脆和充滿牛油香，酸瓜覺得是自家醃製吧？不會超醎酸，還有一股發酵的酒味。漢堡醬足夠漢堡扒有牛香，沙律菜新鮮油醋醬好吃，奶昔一般，不會太甜不會太膩，最好吃竟然是奶昔上的芝士蛋糕。薯條有點失望，剛來時很香脆但轉瞬間就軟硬了，薯味也不算突出（薯條竟然覺得  Five Guys 好吃不止一倍 ），可以不叫。

下次來想吃限定的 Melody Mac 和 Tiramisu 奶昔。

吃完 Flat Iron 已飽，但去到中環怎可以唔食 XTC。以前如搭天星就一定會幫襯，執左之後都好難再吃到。以往必叫三球，送的曲奇好好味，但可惜今次沒有喜歡的味道：咖啡、奶茶、辣椒朱古力、橙朱古力、薑、豆腐……只好叫朱古力、冧酒提子和薄荷朱古力，朱古力濃郁好吃，冧酒提子都OK但都係 Haagen Dazs 好味d，薄荷朱古力又甜左d，連塊曲奇都無咁好味。唔知係因為我食飽左，定係真係質素差左？

生日飯第三餐就勁了，竟然係第我最愛的龍蝦！

經過个園竹語好幾次，都比佢個下午茶吸引。但一個餐裏面總有唔啱食的，就一直無試。食完Cheesecake Factory又去八下佢最新的下午茶，見到配搭好完美，終於完了心願吃到龍蝦。

第一樣上了鮑魚，我對鮑魚無研究，這隻鮑魚是爽口的，鮑汁也濃郁？但老公話糖心軒個鮑汁雞腳d鮑汁好味d。

跟住就上乳龍蝦，乳龍蝦的蝦味真係好濃好香好好吃，不過就是細隻左D，一兩啖就吃完，汁帶點芥茉，甜甜少少辣好夾。

老公最喜歡蟹粉葱油拌麵，我反而普通。蟹粉混了好多殼，很多軟殼和少少硬蟹，蟹粉味也不夠香，比起樂天皇朝一入口就湧出蟹粉腥香，這兒算是好淡口？可能係我唔識食，蟹粉應該係咁？

最後上的小點和甜品，籠子很精緻。我和老公都好喜歡煙燻蛋，我未吃過一道煙燻菜式，真係有一股煙味在口腔良久，好正。

另外，薺菜燒賣都好出色。因為周作人，我一直都對薺菜有種奇怪迷思，一見到就會叫，今次的薺菜燒賣，唯一一次讓我知道，薺菜原來是這種味道：清爽、清新、清香。

蘿蔔絲酥餅的皮很香很特別，覺得是加了鹹蛋？

本來很抗拒心太軟，因為好憎紅棗，怎知老公食完說值得一試。心太軟其實不太軟，糯米比較脆硬，糯米都好食既，甜甜的。但紅棗真係有驚喜，好大粒肉好厚，皮薄又脆口，沒有陳舊的棗味，顛覆我對紅棗既認知。

之後去樂天皇朝特登又叫了心太軟比較一下，睇下係咪我冤枉了紅棗。原來真係个園竹語太出色，因為樂天皇朝的心太軟的紅棗就係我最憎個隻紅棗。

懷舊下午茶

小時候住的屋邨，附近有一間山崎，當時最喜歡吃的是德國燒芝士蛋糕和朱古力爆炸。現在，我已經甚少去山崎買東西，今天和媽媽經過，突然想懷舊一下，媽媽就請我吃了第三件生日蛋糕，還有媽媽特別買給我的兒時味道：火麻仁。

這已經不是用味道去衝量，它的價值是貴價蛋糕無可比擬。

生日驚喜：超正傳統黑森林蛋糕！

我有生日驚喜呀！

這陣子我四圍搵黑森林，一直唔想再食Rosewood，因為覺得上次個蛋糕無酒味呃人。但我周圍尋覓，老公一直都消極支持，因為佢覺得無一個黑森林蛋糕會好吃，只會嘥心機嘥錢和嘥左個胃。點知，原來佢靜雞雞又在Rosewood訂左黑森林喎！

今次蛋糕好有酒味，一食就食到好濃酒味的忌廉，仲有一層酸車厘子蓉中和甜味，面頭的酒釀車厘子酒味勁到我食唔到，食左一粒喉嚨發燙，好過癮。睇下今次呢個蛋糕，蛋糕上的酒釀車厘子係晶瑩剔透的。今次蛋糕超正，我已決定每年都要買Rosewood黑森林做生日蛋糕了！

以前影落的黑森林就見，面頭車厘子只是普通水果，證實左佢比左個無酒版的黑森林我囉。

芭菲又來啦！

昨天食完榴槤小籠包做下午茶，唔夠飽又見壽司郎無乜人，就排隊唸住入去食個甜品，在門口好自然都會望下仲有無立牌，想當然又係全線甜品和立牌都寫住「冇了」。

入到去一按甜品竟然有白桃芭菲，我疑心好大好懷疑係咪真係有？出面寫冇喎，就算有芭菲會唔會有立牌？難得今天鴻運當頭，有乜無乜都好，考慮完10秒就決定食啦！

唸返第一次食抽立牌時，黑氣石的我一下就連中了重複角色，雖然我唔識《我推的孩子》，但抽乜都好都唔想重複嘛。自此都比老公拆，之後就無再重複過，仲識左露比、MEM cyo、黑川，今次都係無重複抽中愛溶，老公好嘢！

點解我又再影相

因為食藥副作用，一胖就胖了10KG，一直不敢影相不想面對。但近來自製生日月，不斷影吃又自拍，少不免又回顧舊照。只不過是三年前，已經判若兩人，10K可不是少嘢的。

今天和媽講起自己好樣衰，她當然就處處安慰我：「肥有肥著衫，肥有肥好睇。」但要著到加加大，虎背熊腰點靚呢？

最難過是藥物副作用的胖根本就避不了減唔到，等如你吃感冒藥可以唔眼瞓咩？而一些不知就裏甚或知道原委的人，一見你就用手比擬肥左咁多呀，不停話搞咩咁肥呀，我真係又氣餒又唔開心。我食好多嘢咩？我無做運動咩？唔係呀，我一直都在奮鬥緊架！

食藥可以唔再十級痛唔再血崩，但除左肥到控制唔到，其實仲有其他副作用。只不過有這個病的人，只要唔再一個月有廿日活如煉獄，這些副作用都只如微塵。

本來我都係咁唸，但真係一影相見到個真相，打擊都真係絕對超級大。

雖然如此，生日月都係要繼續過，仲有時間去玩去開心，今天迎來超強颱風魔羯，風雨聲陪我一晚舒緩情緒，明天再過快樂的日子吧。

雖然沒有美美的body，但依然尋找到快樂，看重這些，輕視那些，是我需要再學習的歷程。