想想女團有邊個

《全民造星4》終於完了，感受就係：造星之路未開始，等出道後再執一執，先至會係一粒星。

其實我覺得女團真係要靚、唱得、跳得，仲要有個人風格、壓得住台，散發獨有魅力。

三甲裏面的 Marf 和 Day 係我一早就睇好，Marf 好明顯係一早已經可以出道，跳舞夠 Charm，唱歌未合格，但唱適合佢音域和風格嘅歌就好OK；Day 其實愈比賽就愈暴露佢嘅不足，但都唔係好緊要，因為佢都好有自己風格，當和一班人一齊喺個台度，而大家都會覺得你係焦點，已經係好難得嘅實力。

其實我最初真係唔睇好 Gao，因為佢一開始就被封女版 Lokman，但同 Lokman 仲差好遠。再加上 Gao 在 B組無乜發揮，印象最深係佢扮師奶。直到最後佢排嘅 "One Night Only" 先見佢嘅實力。佢呢次排埋舞，將隊友嘅能力發揮到極致，完全表現到各人特質和優點：當時好多人唔鍾意嘅方方和開始多人唔鍾意嘅馬欣都好出彩、印象好迷糊嘅榛綦和Alice好突出、唔鍾意跳舞嘅東東好有魅力、跳拉丁強嘅葦翹好有勁，而Gao自己唔爭做 C位嘅謙虛，為佢加咗好多好多分。我覺得這次是《全民造星4》最好睇嘅表演。

人人而家都講女團會有邊個，我都好想知，等我又講下想仲有邊個成員，純粹係講我鍾意，並無考慮女團嘅多樣性、搵錢能力、觀眾緣……

1. Sica，我嘅摯愛，寫左篇文《再見Sica》，所以而家唔講了，睇多次 "Come on, Bad boy" 吧。

2. Winka，由佢唱 "If I Ain’t Got You" 時已經喜歡她，雖然有 d 曲風仲未能駕馭，就像《未知道》好明顯就唔啱佢。不過，Winka 好多演出都無令人失望，在《Nobody 笨珠》中唱得好又夠放，決賽唱《母系社會》夠忘我，好期待佢入團多機會作 solo 大展拳腳。

3. Ivy So，個個話佢靚其實我唔覺，但性格係幾討好，跳舞又有自己風格。人人都質疑佢嘅唱功，但我反而欣賞佢把聲。佢係唱得唔好，佢係走晒音，但佢把聲係特別嘅，而且好有感情，Ivy So 在《勞斯萊斯》中唱那幾句，係好動人的，希望佢好好學唱歌，期待佢會有首抒情歌嘅代表作。

4. 暐翹，我第一次睇暐翹係 "Come on, Bad boy"，剛好是她在《全民造星4》第一次釋放女性美。叻女版個拉丁舞剪影嗰 part 好正，之後每次的演出都令人眼前一亮。暐翹可塑性真係好高，man又得媚又得，純情男又得連地踎流氓都得，睇下《來自天堂的魔鬼》就知，我唔鍾意呢款演繹，但暐翹真係演得好麻甩。

5. So Ching，最初的長櫈表演係好 Charm，後來表演唱一兩句亦唱得好 Smooth 幾吸引，但性格真係唔太出，所以表演時唔係次次都吸引到人，佢需要更認識自己，同埋知道點釋放自我。

6. Candy，其實我唔係特別鍾意 Candy 性格，但我鍾意佢嘅倔強。而且佢比我印象係喜歡抒情歌，而我又好鍾意慢歌，所以我又好期待佢會有 solo。Candy 的《紅綠燈》被視為災難，但我一聽覺得係好OK，因為 Candy 係用心唱歌，會比到人共鳴，呢樣嘢係極之重要；而佢音準又唔係真係差到好離譜，肯定有得進步。最難忘係《無忘花》，2個唱得之人 + 2個唔唱得嘅隊員 + 一首超高難度歌曲，2-2 竟然係10。竟然仲選擇純鋼琴伴奏，未開聲已佩服她們的勇敢及誠意（對比B組就會明我講乜）。她們的合作掩蓋了很多瑕疵，很多和音和編排，都睇得出呢組嘅默契。而大家想保護在死亡名單的阿蛋，睇佢哋嘅眼神和肢體動作，加埋動人嘅聲線，我都眼濕濕。

7. 3妹，無辦法，鍾意就係鍾意。唔靚、唔好聽，但就係鍾意。而且，身為經理人阿Wing竟然可以講「佢入圍我就辭職」呢句說話，咁就比3妹入圍，阿Wing你就辭職吧。

原著與改編，好與差的一線間

原來很多《獵魔士》的書迷，都覺得《獵魔士2》拍得很差，很多地方都偏離原著，而且支線太多，反而《獵魔士1》因較忠於原著而好睇D。

我沒有看《獵魔士》原著，不能比較，但我的喜好本身就很主流，《獵魔士2》電視劇的改編可能就是迎合主流的觀眾吧？反正就很啱我口味，但我也很有興趣睇原著，但疫情下不能去圖書館，或者搵日出書店買，《獵魔士》系列應該值得放上我的書架珍藏。

講開又講，睇左原著再看改編而失望，真的會令人憤慨又氣餒："Harry Potter", "Percy Jackson", "Game of  Thrones", " Wayward Pines"……不過，還是有很多改編，改得與原著同樣出色甚至更好，以下的都是我看完電影後，特意去買或借原著去看的出色電影：

1. The Lord of the Rings

    這個不用多說了，電影是經典，原著是巨著。原著的格局很宏大而描寫很細緻，天馬行空幻想豐富。電影呈現了那種氣氛和氣勢。＂The Lord of the Rings" 是我罕有地可以一看再看的電影。

2. Of Mice and Men 人鼠之間

    "Of Mice and Men" 是很嚴肅的電影，看得人很沈重，很傷感。背景是美國經濟大蕭條時代，兩個摯友一起找工作，一個精明能幹，一個弱智但體格好，他們都是勤勞誠實的人，互相扶持在努力生活，生活艱苦但抱有希望，在農場工作的三天，扭轉了他們的命運。看罷令人很唏噓，久久未能釋懷。

3. Flipped 當年電影譯名：初戀

    我實在太喜歡 "Flipped" 了，之前已經寫了一篇「影後感」〈Flipped: The Whole World〉，今次講改編電影，還是要再提一次。原著的男女主角視角輪流講故事，到電影的男女主角視角輪流看件事，都安排得太好了。我要講的都在之前的文章，有興趣就看我的文章吧。

4. Horse Whisperer 當年電影譯名：情深說話未曾講

    我沒有看原著，但知道原著的結局，覺得電影改得很好。電影很好看，我在戲院看完還特登去買了VCD珍藏。初段小女主角雪地騎馬拍得很有氣氛，墮馬一段緊張得我喘不過氣，到後來找「馬語者」拯救愛馬其實是拯救身心受創的小女主角，一切都拍得很有愛很有情。男女主角談情戲我反而沒感，因為我覺得主線還是人與馬的關係，我因這戲認識並愛上 Scarlett Johansson，覺得這女孩子很漂亮很有性格又很好戲，果然沒多久她就紅了。

5. Everest 珠峰浩劫

    講真，如果我早知這是真實故事，如果我知道結局是如此悲壯，我就不會看電影了。一隊登山隊在珠穆朗瑪峰遇山難的故事，一個（又一個）錯誤的決定，足以造成不可挽回的災難。電影拍得很真實，每每知道危險快到，我都想大喊叫他們快回頭。但事實就是「這是一齣災難紀錄片」，怎麼喊災難都會發生。看完不明白為甚麼要冒這麼大的危險去登頂？但我就是不明白，所以我立刻去借原著看，想知道究竟經驗豐富的領隊，為甚麼會疏忽了？想知道錯誤係點發生？想知道更多當中遇難的細節，想知道他們的更多更多，但愈知得多就愈心痛。我想這個小說與電影的存在，是要警示大家，不要小看大自然，不要讓錯誤重演。題外話：圖書館竟然把原著放在「旅遊書籍區」，這失誤太大。

其實還有很多改編很好的作品，但我太累了，今天就講到此。

《獵魔士2》真係好好睇

終於看完《獵魔士2》了！真係好好睇。

因為我已看完《獵魔士1》一段時間了，試用我有限的記憶力去講講《獵魔士》究竟有多好看。

其實我看完《獵魔士1》時，覺得劇情只是普普通通，不過拍得好有氣氛，男主角Geralt 真係好靚仔，又cool又勁，還有個人人聞風喪膽的綽號「白狼」，一出場真係係威係勢。但第一季很多角色都不是太討好，好像 Geralt 情人Yennefer，一個憤怒、自私、不信任人但又會利用人嘅巫師，但竟然得到男主角的愛……又好像小母獅公主 Ciri 非常刁蠻任性，不漂亮但又舖排她是關鍵人物但又看不出她究竟有乜咁勁……這劇有好多爾虞我詐，其實好 dark，而男主角 Geralt 嘅簡單、正直、無情就變成清流，講真的，第一季整季都是在看男主角。

《獵魔士2》好睇，是因為《獵魔士1》只一個引子，用幾集去單獨介紹幾個主角，《獵魔士2》就是正文，劇情緊密了很多，大概圍繞 Ciri 變成眾人爭奪的對象，Geralt 因為「驚奇法則」不得不保護 Ciri，並協助她了解自己混沌的力量。幾個主角在第二季開始交匯，不再是我找你、你等我；我識你、你唔識我；我信你、但你玩我……第二季多了正面人性的影響（當然仲有好多人性黑暗面），人與人的互信甚至是成功的關鍵，當中有愛、有支持；有出賣、有悔過；有自省、有原諒，由最初的不信任，到交織血與淚，直至最後彼此不可分割。而當中「惡人有惡報」的安排，唔再好似第1季咁 dark 而令人可以一抒鬱結。

男主角在第二季變化頗大，Geralt 變成一個「爸爸」去保護 Ciri，不再是無情無牽掛的獵魔士了。這樣是少了一些冷酷的吸引力，簡直由冷血變成暖男……但他的能力依然強大，而不顧一切去保護 Ciri 又真的令人動容。

公主 Ciri 令人眼前一亮，第一季還是個煩人的小屁孩，第二季已經亭亭玉立，好有公主的風範，對自我很迷惘，對別人很有戒心，但全心全意相信 Geralt，也是會不顧一切去拯救 Geralt，又是很令人動容。在尋找自我時，很勇敢很有毅力，但依然有著很討厭的青少年性格：無耐性、反叛……不過總括來說，Ciri 令人很驚喜，不愧是全劇關鍵人物。

第一季的女主 Yennefer，來到第2季出場少很多，主線都去 Ciri 那裏吧。不過她的塑造是更立體了。怎樣由自私自利去到自我犧牲，她的出場救了一個又一個人（雖然有時也不是她的原意）。一步一步看著她的轉變，很難再討厭她了，只想她可以繼續當個全世界最厲害的巫師吧。

不過，《獵魔士2》精靈的加入，令我好不習慣。精靈給我的形象，就是《魔戒》裏，尊貴的存在。而《獵魔士2》的精靈，竟然像低等動物般被人類唾棄及殺害，喂唔識射箭OK丫，但都唔係乜戰鬥力都無嘛？而且精靈竟然會背信棄義及濫殺無辜，這種卑鄙的精靈，實在顛覆了我的印象。

第2季的結束，引申出更混亂的局面，全世界甚至另一個世界都要捉 Ciri，究竟 Geralt, Yennefe, Ciri 這三人組，怎樣抵擋四方八面的圍攻？而精靈發現 Ciri 的珍貴後，究竟是否真的會保護她？畢竟《獵魔士2》的精靈比我看開的精靈差太多了。

再見Sica

我當初唔睇《全民造星4》，係因為覺得咁多女仔一定好煩，直到Sica的出現，我就由頭睇返晒。

初時睇Sica跳唱〈心急人上〉，係有d覺得「唔係嘛？咁日系？扮日本妹？無咗自己？」但後來睇埋佢嘅既賽前訪問，就發覺這個妹妹好有唸法，明明個樣有d傻，但其實好好清楚自己要乜面對D乜，佢唔理外間既睇法，全心全意咁去追尋，佢嗰種熱血係好有感染力。

放開咗偏見，再睇佢嘅〈心急人上〉，就發現佢嘅表演並唔係咁簡單，音準節拍動作都抓得準，而且好積極，有衝勁，仲有股「一上台就去咗另一個世界」嘅投入。

到後來，Sica嗰組唱 "Come on, Bad Boy!"，Sica的高跟鞋被MIC線纏住而跌倒，佢瞬間執生用肢體動作去救場，再加埋完左評判問佢有無事，而佢又上晒身咁騷首弄姿嘅回應，都令人拍案叫絕＋捧腹大笑，佢真係一個「導演未叫cut都繼續演嘅好演員」。

Sica率真嘅性格真係好討好，覺得佢份人好簡單，想做就做。明明訪問時仲好緊張，但一上台就上晒身。通常私下與台上咁反差嘅人，都係一個成功嘅表演者，因為佢地會融入另一個世界，忘我咁表演，放開晒一切，自然會與別不同。但Sica昨天被foul了，我又唔想去睇返一堆女仔嘅《全民造星》，有好多麻煩嘢、搶嘢、拗嘢、鬥嘢、演嘢……無咗Sica歡笑嘅中和，好難再追落去。

無錯，Marf、Day和So Ching都係好睇嘅，但其實勁歌熱舞何其多，想睇呢D有好多選擇。我都係睇男團女團大嘅，要睇我可以睇返Spice Girl、安室奈美惠 with SUPER MONKEY'S, SPEED……不是勁歌熱舞就完勝，有交流有溝通有想像有共鳴，都係好緊要嘅。只有Sica比我睇到，既演繹到別人，又有豐富嘅自己。